ब्रेक फेल झालेला कंटेनर दरीत कोसळून झाले चार तुकडे 

जखमींना चंदगड येथे प्राथमिक उपचारानंतर बेळगाव येथील रुग्णालयात हलविण्यात आले.

लोकमत न्यूज नेटवर्क, चंदगड : ब्रेक फेल झाल्याने समोरून येणाऱ्या वाहनाला वाचविताना कंटेनर दरीत कोसळून झालेल्या अपघातात चालक व क्लिनर हे दोघेही गंभीर झाल्याची घटना शनिवारी दुपारी तिलारी घाटातील जयकर पाॅंईटवर घडली. कंटेनर शंभर फूट खोल दरीत कोसळून दगडांना धडक देत गेल्याने त्याचे चार तुकडे झाले तर प्रसंगावधान राखून चालकाने उडी मारली तर दुसरा बाहेर फेकला गेला. शशीकुमार पी (परमेश्वर आप्पा (वय ४०, रा. शिमोगा भद्रावती) व विजय मन गुप्ते (वय ३८, रा. अंकली, ता. चिकोडी) अशी जखमींची नावे असून त्यांना चंदगड येथे प्राथमिक उपचारानंतर बेळगाव येथील रुग्णालयात हलविण्यात आले.

शशीकुमार याची प्रकृती चिंताजनक असून विजय याचा हात मनगटातून तुटला आहे. हा अपघात घाटातील जयकर पॉईंट येथे कंटेनरचे ब्रेक फेल झाल्याने घडल्याची प्राथमिक माहिती आहे. अपघाताची माहिती मिळताच वीजघर तपासणी नाक्यावरील पोलीस विजय जाधव, किरण आडे यांनी धाव घेऊन दरीत उतरून दोन्ही जखमींना बाहेर काढत तत्काळ रुग्णालयात हलविले. पोलिसांनी घटनास्थळी भेट दिली असता मॅगी पाकीटे, प्लास्टिक रोल घेऊन बेळगावकडून गोव्यात चाललेल्या या कंटेनरचे चाके, केबिन, इंजिन व हौदा असे चार तुकडे झाले होते. फोटो कोल्डस्कवर नावाने तिलारी घाटात कंटेनर दरीत कोसळून त्याचे चार तुकडे झाले होते.