उद्धव गोडसेकोल्हापूर : ए. एस. ट्रेडर्सने अल्पावधीत पश्चिम महाराष्ट्रासह सीमाभाग आणि विदर्भातही कंपन्यांचा विस्तार वाढवला होता. सुमारे ८२ हजार गुंतवणूकदारांनी विविध योजनांमध्ये १ हजार २३१ कोटी रुपये गुंतवले, तर ए. एस. टोकणमध्ये १८०० कोटी रुपये गुंतवले. अवघ्या पाच वर्षांत ए. एस.च्या संचालकांनी ८२ हजार गुंतवणूकदारांना तीन हजार कोटींचा गंडा घातल्याचे पोलिसांच्या तपासातून स्पष्ट झाले आहे.ए. एस. ट्रेडर्सच्या विरोधात शाहूपुरी पोलिस ठाण्यात फिर्याद दाखल झाली, तेव्हा फिर्यादी रोहित सुधीर ओतारी यांच्या जबाबात फसवणुकीची रक्कम ४ कोटी ८९ लाख ७२ हजार ६४९ रुपये असल्याचा उल्लेख केला होता. तपासादरम्यान या गुन्ह्याची व्याप्ती खूपच मोठी असल्याचे समोर आले. २०१७ मध्ये सुरू झालेल्या ए. एस. ट्रेडर्स कंपनीद्वारे लोहितसिंग सुभेदार, अमर चौगुले, बाबूराव हजारे, विजय पाटील, भिकाजी कुंभार, निसार मुल्ला आणि अमित शिंदे यांनी साथीदारांना हाताशी धरून गुंतवणूकदारांकडून कोट्यवधी रुपयांची माया जमा केली. नोकरदार, व्यावसायिक, उद्योजक आणि काही राजकीय व्यक्तीच्या नावांचा वापर करून त्यांनी गुंतवणूकदारांना आकर्षित केले. दुप्पट परताव्याचे आमिष, महागड्या भेटवस्तू, मोठ्या हॉटेल्समधील रंगारंग सेमिनार्स, देश-विदेशातील सहली याची भुरळ पडल्याने ८२ हजार गुंतवणूकदारांनी डोळे झाकून ए. एस. ट्रेडर्ससह संलग्न कंपन्यांमध्ये सुमारे तीन हजार कोटींची गुंतवणूक केली.सुुरुवातीचे काही महिने चांगला परतावा मिळाल्याने सर्वच गुंतवणूकदार खूश होते. आणखी मोठा फायदा मिळवण्यासाठी गुंतवणूकदारांनी कर्ज काढून, दागिने गहाण ठेवून, हातउसणे पैसे घेऊन, सावकारी कर्ज घेऊन ए. एस.मध्ये गुंतवणूक केली. आता मूळ गुंतवणूक अडकली असून, परतावे बंद आहेत. मुद्दल परत मिळेल की नाही, याची खात्री नसल्याने गुंतवणूकदार हवालदिल झाले आहेत.शासकीय यंत्रणांची दिशाभूलशेतीशी संबंधित कंपन्यांना व्यवसाय कर, प्राप्तिकर, जीएसटी कमी आहे. हीच बाब लक्षात घेऊन ए. एस.च्या संचालकांनी शासन दरबारी कंपन्यांची नोंदणी करताना दिशाभूल केली. शेतीपूरक व्यवसाय असल्याचे कागदोपत्री दाखवून या कंपन्यांनी कर चुकवेगिरी केली. याबाबत जबाबदार शासकीय यंत्रणांनी ए. एस. ट्रेडर्स आणि ट्रेडविंग्ज कंपनीला फटकारल्याचे पोलिसांनी सांगितले.
पुरावे लपविण्याची धडपड
गुन्हे दाखल होताच ए. एस.च्या संचालकांनी पुरावे लपविण्याची धडपड केली. कंपनीच्या कार्यालयांमधील महत्त्वाची कागदपत्रे, बँक खात्यांचे तपशील, संगणकांमधील हार्डडिस्क लांबवल्या. तपास अधिकाऱ्यांनी मोठ्या शिताफीने सायबरतज्ज्ञांच्या मदतीने माहिती मिळवली. यामुळेच गुंतवणूकदारांची संख्या आणि गुंतवणुकीची रक्कम समोर आली.गडहिंग्लजमधील शिक्षक दाम्पत्याचे ४५ लाख अडकलेगडहिंग्लज तालुक्यातील एका शिक्षकाने कोजिमाशीमधून २० लाख, तर प्राथमिक शिक्षिका असलेल्या त्यांच्या पत्नीने शिक्षक बँकेतून २५ लाख रुपयांचे कर्ज काढून ए. एस.मध्ये ४५ लाखांची गुंतवणूक केली होती. त्यांना परताव्याचे केवळ पाच हप्ते मिळाले. आता बँकांचे हप्ते भरण्यासाठी पुन्हा कर्ज काढण्याची वेळ त्यांच्यावर आली आहे. विशेष म्हणजे, एका मित्राने गरजेच्या वेळी या दाम्पत्याकडे उसणे दोन लाख मागितले होते. त्याला नकार देऊन दाम्पत्याने ए. एस.मध्ये पैसे गुंतवले होते.