माजी खासदार राजू शेट्टी यांच्यासह ८० जणांची निर्दोष मुक्तता, नेमकं प्रकरण कोणते.. वाचा

कोल्हापूर : ऊस दराच्या मुद्द्यावरून पुणे-बंगळुरू महामार्गावर सांगली नाका येथे झालेल्या हिंसक आंदोलनाच्या खटल्याचा कोल्हापूर जिल्हा सत्र न्यायालयात निकाल लागला. जिल्हा न्यायाधीश (२) डी. व्ही. कश्यप यांनी माजी खासदार राजू शेट्टी यांच्यासह ८० आंदोलकांची निर्दोष मुक्तता केली. या निर्णयानंतर आंदोलकांनी न्यायालयाबाहेर आनंदोत्सव साजरा केला. तसेच आंदोलनाला पुन्हा बळ मिळाल्याची भावना शेट्टी यांनी व्यक्त केली.ऊस दर आंदोलनादरम्यान माजी खासदार राजू शेट्टी यांना पोलिसांनी ताब्यात घेतले होते. त्या घटनेच्या निषेधार्थ कोल्हापूर, सांगली जिल्ह्यातील हजारो शेतकरी रस्त्यावर उतरले होते. त्यावेळी वाहनांची तोडफोड आणि जाळपोळ झाल्याने एकूण तीन हजार ७८१ आंदलोकांवर गुन्हे दाखल झाले होते. यात शिरोली नाका परिसरातील ८० आंदोलकांचा समावेश होता. या खटल्याचा निकाल देताना जिल्हा न्यायाधीश (२) कश्यप यांनी आंदोलनाचे नेतृत्व करणारे राजू शेट्टी आणि ८० आंदोलकांची सबळ पुराव्यांअभावी निर्दोष मुक्तता केली. संघटनेच्या वतीने ॲड. ब्रिजेश शास्त्री, ॲड. श्रेणिक पाटील, ॲड. अमेय मकरे, ॲड. सुवर्णभद्र पाटील, आदींनी कामकाज पाहिले.