उल्हासनगर महापालिका शाळा इमारत बांधून सज्ज,  मात्र मुलांची किलबिल नाही, इमारतीचे उदघाटन कधी 

शाळा इमारत बांधण्याचे रखडल्यावर, महापालिकेने शाळा बांधण्याचा ठेका दुसऱ्या ठेकेदाराला दिला. त्यानंतर एका वर्षात चार मजली इमारत उभी राहिली...

उल्हासनगर : महापालिका शाळा क्रं-२४ व १८ ची इमारत तब्बल ७ वर्षानंतर बांधून पूर्ण होऊनही शैक्षणिक वर्षात शाळेत मुलांची किलबिल सुरु झाली नाही. शेकडो मुलांना यावर्षीही खाजगी शाळेच्या छताखाली शिक्षणाचे धडे गिरवावे लागणार असल्याची टिका नागरिकांकडून होत आहे. उल्हासनगर कॅम्प नं-२, खेमानी परिसरात महापालिका शाळा क्रं-२४ ही मराठी माध्यमाची तर शाळा क्रं-१८ ही हिंदी माध्यमाची शाळा आहे. दोन्ही शाळेत ७ वर्षांपूर्वी एकूण ९०० पेक्षा जास्त मुलांची संख्या होती. पुनरबांधणीच्या नावाखाली शाळेतील मुले एका खाजगी शाळेच्या छताखाली शिक्षणाचे धडे गिरवीण्यासाठी पाठविले. शाळा इमारत बांधण्याचे रखडल्यावर, महापालिकेने शाळा बांधण्याचा ठेका दुसऱ्या ठेकेदाराला दिला. त्यानंतर एका वर्षात चार मजली इमारत उभी राहिली.

 गेल्या ७ वर्षात दोन्ही शाळेतील शेकडो मुले एका खाजगी शाळेच्या छताखाली शिक्षण घेत आहेत. तसेच दोन्ही शाळेतील मुलांची संख्याही निम्यावर आली. यावर्षी नवीन इमारती मध्ये मुलांची किलबिल राहणार असे वाटत असताना, इमारतीचे उदघाटन झाले नाही. त्यामुळे यावर्षीही मुले एका खाजगी शाळेच्या छताखाली शिक्षणाचे धडे गिरवीत आहेत. महापालिका शिक्षण विभागाने शाळा क्रं-२४ व १८ ही नवीन इमारती मध्ये सुरु होणार असल्याचे संकेत दिले होते. तसेच ऐक शाळा इंग्रजी माध्यमाची तर तीन शाळा सेमी इंग्रजी माध्यमाच्या नवीन शैक्षणिक वर्षापासून सुरु करण्याचे प्रशासन अधिकारी कुंदा पंडित यांनी सांगितले होते. मात्र महापालिकेच्या सेमी व इंग्रजी माध्यमाच्या शाळा नवीन शैक्षणिक वर्षापासून सुरूच झाल्या नाहीत. तसेच नवीन इमारत बांधून पूर्ण झाल्यावरही, त्यामध्ये शाळा क्रं-२४ व १८ सुरु करता आले नाही. समाजसेवक प्रवीण माळवे, मनसेचे जिल्हाप्रमुख बंडू देशमूख यांनी इमारतीच्या उदघाटनाचा प्रश्न बाजूला ठेवून इमारती मध्ये वर्ग सुरु करण्याचे सल्ला दिला. याबाबत आयुक्त मनिषा आव्हाळे, शिक्षण विभागाचे प्रशासन अधिकारी कुंदा पंडित यांच्याशी संपर्क करण्याचा प्रयत्न केला. मात्र झाला नाही.