उद्धवसेनेचे दोन नगरसेवक मनसेच्या गोटात; शिंदेसेनेच्या संपर्कातील दोघांवर कारवाईची मागणी

उद्धवसेनेचे ११ वरून झाले ७ नगरसेवक

लोकमत न्यूज नेटवर्क, कल्याण: कल्याण डाेंबिवली महापालिकेच्या निवडणुकीनंतर नगरसेवक पळवापळवीच्या गोंधळानंतर मंगळवारी अभूतपूर्व गोंधळ उडाला. उद्धवसेनेचे दोन नगरसेवक शिंदेसेनेच्या संपर्कात असताना नाट्यमय घडामोडींनतर पुन्हा २ नगरसेवक मनसेच्या गोटात गेल्याने आश्चर्य व्यक्त होत आहे. उद्धवसेनेची नगरसेवक संख्या ११ वरून आता ७ वर घसरली आहे.

उद्धवसेनेने ७ जणांच्या गटाची नोंदणी मंगळवारी कोकण विभागीय आयुक्तांकडे केली आहे, तसेच शिंदेसेनेच्या संपर्कातील दोघांवर अपात्रतेची कारवाई करण्यात यावी, असेही पत्र दिल्याची माहिती जिल्हाप्रमुख शरद पाटील यांनी दिली. कल्याण-डोंबिवलीत उद्धवसेनेचे ११ नगरसेवक निवडून आले. ११ पैकी २ नॉट रिचेबल होते. गटनेता निवडीच्या सोमवारच्या बैठकीला त्यांनी दांडी मारली. उद्धवसेनेचे संख्याबळ आता ११ वरून ७ वर आले आहे, तर उद्धवसेनेच्या स्वप्नाली केणे आणि राहुल काेट मनसेच्या गोटात गेल्याने मनसेचे संख्याबळ ५ वरून ७ झाले आहे. हे दोघेही नगरसेवक मूळचे मनसेचे आहेत. ते मंगळवारी गट स्थापनेसाठी कोकण भवन कार्यालयात गेले नाहीत.

दोघांची बैठकीला दांडी

उद्धवसेनेचे नगरसेवक मधुर म्हात्रे आणि ॲड. कीर्ती ढोणे यांनी खा. डॉ. श्रीकांत शिंदे यांची भेट घेतली. शिंदेसेनेने तिकीट नाकारल्यानंतर म्हात्रे यांनी उद्धवसेनेचे तिकीट मिळविले. त्यांच्याशी संपर्क न झाल्याने त्यांच्या घराबाहेर भिंतीवर पक्षाच्या बैठकीची नोटीस लावली होती. 

उद्धवसेनेचे ११ वरून झाले ७ नगरसेवक

• उद्धवसेनेचे विजयी नगरसेवक- ११
• शिंदेसेनेच्या संपर्कात- ०२
• मनसेच्या गोटात- ०२
• उद्धवसेनेकडून गट स्थापन- ०७

शिंदेसेना-उद्धवसेनेच्या पदाधिकाऱ्यांची भेट

शिंदेसेनेचे विधानसभा संपर्कप्रमुख महेश गायकवाड यांनी उद्धवसेनेचे जिल्हाधिकारी शरद पाटील यांची मंगळवारी भेट घेतली. त्यांच्या भेटीमुळे राजकीय वर्तुळात विविध चर्चा सुरू झाल्या आहेत. मात्र, पाटील आणि गायकवाड यांनी ही भेट कौटुंबिक आणि मैत्रीपूर्ण होती. त्याचा राजकीय घडामोडींशी काही संबंध नसल्याचे स्पष्ट केले.

उमेश बोरगावकर उद्धवसेनेच्या गटनेतेपदी

उद्धवसेनेच्या गटनेतेपदी निवड झालेले उमेश बोरगावकर हे आधी राष्ट्रवादीत (अजित पवार) होते. महापालिका निवडणुकीच्या तोंडावर त्यांनी शिंदेसेनेत प्रवेश केला होता. मात्र, ते ज्या प्रभागातून इच्छुक होते. तेथून त्यांना उमेदवारी मिळाली नाही. त्यांनी ऐनवेळी उद्धवसेनेत प्रवेश केला आणि त्यांना उमेदवारी मिळाली. ते आता महापालिकेत गटाचे नेतृत्व करणार आहेत.