कल्याण - भटक्या विमुक्तांना नोकरीत पदोन्नती देता येणार नाही असे प्रतिज्ञापत्र राज्यशासनाने सर्वोच्च न्यायालयात सादर केल्याने राज्यातील हजारो भटक्या समाजातील कर्मचारी व अधिकाऱ्यांमध्ये राज्य शासनाच्या विरोधात संतापाची भावना निर्माण झाली आहे. हे अन्यायकारक प्रतिज्ञापत्र मागे घेण्यासाठी कल्याणात भाजपतर्फे आज जोरदार आंदोलन करण्यात आले. कल्याणच्या तहसील कार्यालयावर भाजपच्या भटके विमुक्त आघाडीतर्फे 'चाबूक मोर्चा' काढून राज्य सरकारचा निषेध करण्यात आला. या 'चाबूक मोर्चा'मध्ये सहभागी झालेल्या पोतराज अर्थातच कडकलक्ष्मीकडून आसूड ओढत सरकारचा निषेध करण्यात आला.
राज्य सरकारने गेल्या महिन्यात भटके विमुक्त जमातीच्या शासकीय कर्मचारी-अधिकाऱ्यांच्या पदोन्नतीमधील आरक्षणासंदर्भात सर्वोच्च न्यायालयात प्रतिज्ञापत्र सादर केले आहे. त्यामध्ये भटक्या विमुक्त जाती जमातींना आरक्षण देणे असंविधानिक असल्याचे राज्य शासनाने नमूद केल्याचे भाजपतर्फे तहसीलदारांना देण्यात आलेल्या निवेदनात नमूद करण्यात आले आहे. एकीकडे राज्य सरकारकडून वर्षानुवर्षे डॉ. बाबासाहेब आंबेडकरांच्या नावाने मतं मागितली आणि त्याच समाजाला वंचित करण्याचे काम सरकारने सुरू केलं आहे.
राज्य सरकारच्या या प्रतिज्ञापत्रामुळे भटक्या विमुक्त जाती जमातीमध्ये संतापाची लाट पसरली असून राज्य सरकारचा विरोध करण्यासाठी आज हे आंदोलन करण्यात आलं असं भाजपाचे आमदार गणपत गायकवाड यांनी सांगितलं. भटके विमुक्त जाती जमाती समाजाचे आरक्षण रद्द करण्याचा निर्णय राज्य सरकारने मागे घेऊन त्यांना न्याय देण्याची मागणी यावेळी करण्यात आली. या मोर्चामध्ये भाजप जिल्हाध्यक्ष शशिकांत कांबळे, भाजपच्या भटके विमुक्त आघाडीचे कल्याण जिल्हाध्यक्ष विष्णू सांगळे व इतर भाजप पदाधिकारी - कार्यकर्ते उपस्थित होते.