रेल्वे स्टेशनवर खाण्या-पिण्याचं सगळं मिळतं, पुस्तकंही मिळतात...पण मग मेडिकल स्टोर का नसतं? पाहा कारण...

Railway Station Facts : रेल्वे स्टेशन हे इतकी गर्दी असलेलं ठिकाण असूनही इतर अनेक गोष्टी मिळत असूनही स्टेशनवर मेडिकल स्टोर का नाही? चला जाणून घेऊ यामागचं कारण...

Railway Station Facts : रेल्वे ही भारताची लाइफलाईन म्हटली जाते. कारण दररोज लाखो लोक रेल्वेने प्रवास करत आपल्या ठिकाणावर पोहोचतात. कुठेतरी जाताना किंवा कुठून येताना सगळेच काही वेळ रेल्वे स्टेशनवर नक्कीच घालवतात. स्टेशनवर चहा, कॉफी, पाणी, पुस्तके आणि इतरही अनेक गोष्टी स्टेशनवर सहजपणे मिळतात. पण स्टेशनवर मेडिकल स्टोर म्हणजे औषधांचं दुकान नसतं. आपण कधी विचार केलाय का की, इतकी गर्दी असलेलं ठिकाण असूनही इतर अनेक गोष्टी मिळत असूनही स्टेशनवर मेडिकल स्टोर का नाही? चला जाणून घेऊ यामागचं कारण...

रेल्वे स्टेशनवर औषधांचं दुकान नसण्याचं कारण समजून घेण्याआधी हे समजून घेणं महत्वाचं आहे की, औषधं विकणं काही सामान्य काम नाही. यासाठी काही कायदेशीर नियम बनवण्यात आले आहेत. प्रत्येक मेडिकल स्टोरसाठी लायसेन्स लागतं आणि तिथे एक प्रशिक्षित फार्मासिस्ट असावा लागतो. त्याशिवाय औषधं योग्य तापमान आणि सुरक्षित वातावरणात ठेवावी लागतात.

स्टेशनवर हे पाळणं अवघड

रेल्वे स्टेशनवर नेहमीच धावपळ, गर्दी असते. अशात औषधे सुरक्षित ठेवणं आणि सगळ्या नियमांचं पालन करणं काही सोपं काम नाही. त्यासोबतच नकली औषधांना आळा घालणे आणि त्यांचा चुकीचा वापर रोखणे एक मोठं आव्हान ठरू शकतं. स्टेशनवर दुकानांचं भाडं आणि ती चालवण्याचा खर्च बराच असतो. त्यामुळे तिथे मिळणाऱ्या गोष्टी या बाजारापेक्षा जास्त महाग मिळतात. पण औषधांच्या किंमती मनाने वाढवता येत नाहीत. अशात मेडिकल स्टोर चालवणं तिथे फायद्याचं ठरणार नाही. आणखी एक कारण म्हणजे जास्तीत जास्त लोक प्रवास सुरू करण्याआधी आपल्यासाठी आवश्यक औषधे सोबत आणतात. त्यामुळे स्टेशनवर औषधांना जास्त मागणी राहणार नाही.  

रेल्वे देते मेडिकल सुविधा  

रेल्वे विभागाला प्रवाशांच्या आरोग्याची काळजी नाही, असं अजिबात नाही. जवळपास सगळ्याच मोठ्या स्टेशनवर फर्स्ट-एट रूम किंवा मेडिकल पोस्ट असतं. सोबतच डॉक्टर आणि मेडिकल स्टाफही असतो. जे गरज पडल्यास प्राथमिक उपचार करतात. स्थिती जास्तच गंभीर असेल तर जवळच्या हॉस्पिटलमध्ये संपर्क केला जातो. जर धावत्या रेल्वे कुणाची तब्येत बिघडली तर हेल्पलाइन नंबरवर कॉल केल्यास मेडिकल मदत केली जाते. रेल्वेचं मुख्य काम रेल्वे सुरक्षित आणि वेळेवर चालवणं आहे. जर स्टेशनवर मेडिकल सुरू करण्याची परवानगी दिली तर याने सुरक्षेची आणि प्रशासकीय जबाबदारी आणखी वाढू शकते.