दिवाळीच्या काळात लोक नवीन वस्तू घरी आणतात. या काळात अनेकजण नवीन कारही घेतात. यासाठी त्यांना लाखो रुपये खर्च करावे लागतात. पण याच दरम्यान एक आश्चर्यकारक घटना समोर आली आहे. आसाममधील बारपेटा येथील एका 17 वर्षीय विद्यार्थिनीने 50 लाख रुपयांची आलिशान कार केवळ 100 रुपयांमध्ये जिंकली आहे.
दिशा दास असं या विद्यार्थिनीचं नाव असून ती सध्या बारावीत शिकत आहे. तिने मर्सिडीज बेंझ कार फक्त 100 रुपयांमध्ये जिंकली आहे. दिशा दास ही तिच्या पालकांची एकुलती एक मुलगी आहे. लकी ड्रॉ कूपनद्वारे तिने ही लक्झरी कार जिंकली. लकी ड्रॉ चा निकाल आल्यानंतर श्रीमंतांची शान मानली जाणारी मर्सिडीज कार तिच्याकडे आली.
बारपेट बुक अँड सायन्स फेयर फेब्रुवारी 2024 मध्ये होणार आहे. त्याला पाठिंबा देण्यासाठी हा लकी ड्रॉ आयोजित करण्यात आला होता. त्याचं पहिलं बक्षीस मर्सिडीज बेंझ कार होतं. इतरांप्रमाणेच दिशा दासनेही काउंटरवरून गिफ्ट कूपन विकत घेतलं होतं. तिने आपल्या सेव्हिंगमधून दोन कूपन खरेदी केले होते.
या दोन कूपनपैकी एका कूपनने तिचं नशीब उजळलं आणि तिला एक आलिशान कार भेट म्हणून मिळाली. म्हणजेच दिशाचं नशीब एका रात्रीत बदललं. पहिलं बक्षीस मिळाल्याची बातमी समजताच ती खूप आनंदी झाली आहे. एका हिंदी वेबसाईटने याबाबतचे वृत्त दिले आहे.