बापरे! २०२६ उजाडलं तरी 'या' देशात इंटरनेटचा पत्ता नाही; गुगल अन् फेसबुकशिवाय कसं चालतंय आयुष्य?

२०२६ मध्येही जगाच्या पाठीवर असा एक देश आहे, जिथे इंटरनेट ही चैनीची गोष्ट नसून एक दुर्मिळ स्वप्न आहे.

आजच्या काळात आपण इंटरनेटशिवाय पाच मिनिटेही राहण्याची कल्पना करू शकत नाही. सकाळी उठल्यापासून ते रात्री झोपण्यापर्यंत प्रत्येक कामासाठी आपण गुगल, व्हॉट्सॲप आणि ऑनलाईन बँकिंगवर अवलंबून आहोत. मात्र, तुम्हाला ऐकून आश्चर्य वाटेल की, २०२६ मध्येही जगाच्या पाठीवर असा एक देश आहे, जिथे इंटरनेट ही चैनीची गोष्ट नसून एक दुर्मिळ स्वप्न आहे. 'इरिट्रिया' असे या देशाचे नाव असून, या देशाला जगातील सर्वात कमी कनेक्टेड देश मानले जाते.

डिजिटल जगापासून मैलोनमैल दूर

आफ्रिका खंडातील छोटासा देश असलेला इरिट्रिया आजही डिजिटल क्रांतीपासून अनभिज्ञ आहे. येथील बहुतांश लोकसंख्या आजही ऑनलाईन जगापासून पूर्णपणे दूर आहे. मोठ्या शहरांचा अपवाद वगळता ग्रामीण भागात इंटरनेट पोहोचलेलेच नाही. विशेष म्हणजे, जेथे इंटरनेट सुविधा आहे, तिथेही ती इतकी मर्यादित आहे की ती केवळ नावापुरतीच उरली आहे.

सरकारचा 'डिजिटल' पहारा

इरिट्रियामध्ये इंटरनेटवर सरकारचे अत्यंत कडक नियंत्रण आहे. सर्व नेटवर्क सरकारी संस्थांच्या माध्यमातून चालवले जातात आणि प्रत्येक हालचालीवर सरकारची करडी नजर असते. सामान्य नागरिकांना इंटरनेट वापरण्याची मोकळीक नाही. जर कोणी इंटरनेट वापरण्याचा प्रयत्न केला, तर त्याच्या प्रत्येक क्लिकवर सरकारचे लक्ष असते, ज्यामुळे लोक इंटरनेट वापरण्यास घाबरतात.

का आहे हा देश इतका मागे?

कमकुवत पायाभूत सुविधा: येथे ब्रॉडबँड आणि मोबाईल इंटरनेटसाठी आवश्यक असलेले टॉवर्स आणि तंत्रज्ञान उपलब्ध नाही.

अवाढव्य किंमत: जिथे इंटरनेट उपलब्ध आहे, तिथे त्याची किंमत इतकी जास्त आहे की सामान्य माणसाला ते परवडत नाही.

गोगलगायीचा वेग: येथील इंटरनेटचा वेग इतका संथ आहे की साधे ई-मेल उघडण्यासाठीही तासनतास वाट पाहावी लागते.

शिक्षण आणि व्यापाराला मोठा फटका

इंटरनेट नसल्याचा सर्वात मोठा परिणाम येथील तरुण पिढीवर होत आहे. जग ऑनलाईन शिक्षणाकडे वळलेले असताना येथील विद्यार्थ्यांना साध्या माहितीसाठीही जुन्या पुस्तकांवर अवलंबून राहावे लागते. तसेच, आंतरराष्ट्रीय व्यापार आणि दळणवळणाच्या बाबतीत हा देश उर्वरित जगाच्या तुलनेत अनेक दशके मागे पडला आहे. जगातील अनेक देश आता '६जी'च्या तयारीत असताना इरिट्रियामधील परिस्थिती ही जागतिक 'डिजिटल डिव्हाइड'चे एक भीषण वास्तव समोर आणते.