फोटो आरोपी
जळगाव : राहुरी महात्मा फुले कृषी विद्यापीठात कारकून म्हणून नोकरीला लावून देण्याचे आमिष दाखवून दोघांना साडेसहा लाख रुपयांना गंडा घालण्यात आल्याचा प्रकार उघडकीस आला आहे. याप्रकरणी दीपक बापू जाधव (रा. वासखेडी, ता. साक्री, जि.धुळे) याला शनी पेठ पोलिसांनी मंगळवारी अटक केली.
वंदना अशोक मराठे ऊर्फ वंदना सचिन बुचडे (३१, रा.जोशी पेठ, जळगाव ह.मु., मुंबई) यांनी, तसेच त्यांचे चुलत भाऊ वाल्मीक सुरेश पाटील यांनी दीपक जाधव याला २०१८ व २०१९ या दोन वर्षांत ६ लाख ४० हजार १०० रुपये वेळोवेळी दिले आहेत. काही रक्कम बँक खात्यात, तर काही रक्कम ऑनलाइन वर्ग केलेली आहे. राहुरी कृषी विद्यापीठात दोघांना लिपिक म्हणून नोकरी लावून देण्याचे आमिष जाधव याने दाखविले होते. तीन वर्षांत त्याने ना नोकरीला लावले ना पैसे परत केले. आपली फसवणूक झाल्याचे लक्षात आल्यानंतर वंदना यांनी शनी पेठ पोलीस स्टेशन गाठून तक्रार दिली. त्यानुसार जाधव याच्याविरुद्ध सोमवारी फसवणुकीचा गुन्हा दाखल करण्यात आला आहे. दरम्यान, पोलीस निरीक्षक विठ्ठल ससे, उपनिरीक्षक कवडे, हवालदार रवींद्र संभाजी पाटील, किशोर पाटील व रवींद्र पाटील यांच्या पथकाने जाधवला सोमवारी दुपारी अटक केली.