महाराष्ट्र स्थानिक स्वराज्य संस्था निवडणुकीचे निकाल सुरू असताना जळगावमधून महत्त्वाची बातमी समोर आली. महायुतीचे उमेदवार ललित कोल्हे यांनी तुरुंगातून निवडणूक लढवून दणदणीत विजय मिळवला असून, त्यांची आई सिंधुताई कोल्हे आणि मुलगा पियुष कोल्हे यांनीही विजयाचा गुलाल उधळला आहे. कोल्हे कुटुंबातील या तिन्ही सदस्यांच्या विजयानंतर त्यांच्या समर्थकांनी जळगावात मोठ्या जल्लोषात आनंद साजरा केल्याचे पाहायला मिळाले.
या विजयानंतर माध्यमांशी बोलताना ललित कोल्हे यांच्या पत्नी सरिता कोल्हे यांना अश्रू अनावर झाले. आपल्या मुलाची, पियुषची गळाभेट घेताना त्या भावूक झाल्याचे पाहायला मिळाले. सरीता कोल्हे म्हणाल्या की, "माझे पती तुरुंगात आहेत. त्यांच्यावर अतिशय घृणास्पद आरोप करण्यात आले होते. पण आज आमच्या मतदारांनी मतांच्या रूपाने आशीर्वाद दिला आहे. हा विजय सत्याचा आणि जनतेच्या प्रेमाचा आहे."
या विजयामागे कोल्हे कुटुंबाचा मोठा त्यागही समोर आला. ललित कोल्हे यांना अटक झाल्यापासून सरिता कोल्हे आणि त्यांचा मुलगा पियुष कोल्हे यांनी चप्पल न घालण्याची शप्पथ घेतली. याबाबत बोलताना त्यांनी भरल्या डोळ्यांनी सांगितले की, "माझे पती, सासू आणि मुलगा तिघेही जिंकले आहेत. ललित कोल्हे अटकेत असल्यापासून आम्ही दोघांनी चप्पल घातलेली नाही. मी निश्चय केला होता की, ते परत आल्यावरच मी चप्पल घालेन. आज जनतेने ते शक्य करून दाखवले आहे."
प्रभाग क्रमांक ११ येथून ललित कोल्हे आणि त्यांच्या आई सिंधुताई कोल्हे यांच्यासह शिवसेनेचे चारही उमेदवार विजयी झाले. तर, प्रभाग क्रमांक ४ येथून पियुष ललित कोल्हे यांनी महायुतीचे उमेदवार म्हणून दणदणीत विजय संपादन केला. तुरुंगातून निवडणूक लढवूनही मतदारांनी दिलेल्या या कौलामुळे राजकीय वर्तुळात मोठी चर्चा रंगली आहे. विजयानंतर विजयी मिरवणुकीत कार्यकर्त्यांच्या उत्साहापेक्षा कोल्हे कुटुंबातील सदस्यांच्या डोळ्यांतील आनंदाश्रूच सर्वांचे लक्ष वेधून घेत होते.
Web Summary : Lalit Kolhe won Jalgaon's election from jail. His mother and son also secured victories. Supporters celebrated, while his wife expressed emotional gratitude for the voters' support and the family's triumph, marking a significant win.
Web Summary : ललित कोल्हे ने जेल से जलगाँव चुनाव जीता। उनकी माँ और बेटे ने भी जीत हासिल की। समर्थकों ने जश्न मनाया, जबकि उनकी पत्नी ने मतदाताओं के समर्थन और परिवार की जीत के लिए भावनात्मक आभार व्यक्त किया, जो एक महत्वपूर्ण जीत है।