लोकमत न्यूज नेटवर्क
जळगाव : शहराच्या सुरक्षेसाठी मनपाच्या अग्निशमन विभागात ४ सुसज्ज अग्निशमन बंब दाखल झाले आहेत. मंगळवारी महापौर भारती सोनवणे, आमदार सुरेश भोळे यांच्या हस्ते बंबांचे लोकार्पण करण्यात आले. यावेळी उपमहापौर सुनील खडके, महिला व बाल कल्याण सभापती रंजना सपकाळे, भाजप महानगराध्यक्ष दीपक सूर्यवंशी, गटनेते भगत बालाणी, नगरसेवक कैलास सोनवणे, सभागृह नेते ललित कोल्हे, शिवसेनेचे गटनेते अनंत जोशी, उपायुक्त प्रशांत पाटील, उपायुक्त पवन पाटील, वाहन विभागप्रमुख गोपाळ लुले, अग्निशमन विभाग प्रमुख शशिकांत बारी व कर्मचारी उपस्थित होते.
जळगाव शहराच्या सुरक्षेसाठी आणि अग्निशमन विभाग अधिक बळकट करण्यासाठी मनपात ४ बंब नव्याने दाखल झाले आहेत. आग सुरक्षा निधी अंतर्गत १, जिल्हा नियोजन निधी अंतर्गत १, मनपा फंडातून २ बंब खरेदी करण्यात आले आहेत. शहरासाठी नव्याने दाखल होणारे बंब मे महिन्यातच मनपाला मिळणार होते; परंतु लॉकडाऊन लागल्याने ते काम प्रलंबित राहिले. वाहन विक्रेत्याचे शोरूम बंद, उपप्रादेशिक परिवहन विभाग आणि थर्ड पार्टी इन्स्पेक्शन होऊ शकत नसल्याने वाहने अग्निशमन विभागाला मिळू शकत नव्हती. दरम्यान, लॉकडाऊनमध्ये शिथिलता मिळाल्यानंतर चारही बंब मनपाला प्राप्त झाले आहेत.