लोकमत न्यूज नेटवर्क
जळगाव : जिल्ह्यात रोजगार हमी योजनेची एकूण १ हजार ६७३ कामे सुरू आहेत. या कामांवर दिवसाला ८ हजार ९२ मजूर काम करत आहेत, तर त्यातील २८५ कामे ही शासकीय यंत्रणेच्या स्तरावर आहेत, तर १ हजार ३८८ कामे ही ग्रामपंचायत स्तरावर सुरू आहेत, तर नाशिक विभागात सध्या ७ हजार ८३० कामे सुरू आहेत. त्यातून विभागात ३६ हजार १२६ जणांना रोजगार मिळाला आहे.
कोरोनामुळे लागलेल्या लॉकडाऊनमध्ये अनेकांचा रोजगार गेला होता. त्यासोबतच बहुतेक जण मुंबई-पुण्याहून बरेच कामगार आपल्या मुळगावीदेखील परतले होते. त्यांनाही जिल्ह्यात विविध ठिकाणी रोजगार उपलब्ध व्हावा, यासाठी काही दिवसांमध्ये जिल्ह्यात ग्रामपंचायतींच्या माध्यमातून रोजगार हमीच्या कामांना सुरुवात करण्यात आली होती. सध्या जिल्ह्यात १ हजार ३८८ कामे ही ग्रामपंचायत स्तरावर सुरू आहेत. त्या ठिकाणी ६ हजार ४५३ जणांना काम मिळाले आहे.
धुळे जिल्ह्यात ५८४ कामे सुरू असून, दोन हजार ६६२ मजुरांना काम मिळाले आहे. नंदुरबार जिल्ह्यातही १ हजार ८६६ कामांवर ८ हजार १६ मजूर कामावर आहेत. खान्देशात सर्वांत जास्त रोहयोतून काम हे जळगाव आणि नंदुरबार या दोन जिल्ह्यांमध्ये सुरू आहे.