--------------------
ट्रकची दुचाकीला धडक
एका मृत्यू ; बावणेपांगरी फाट्याजवळील घटना
चंदनझिरा : भरधाव वेगाने येणाऱ्या ट्रकने दुचाकीला धडक दिल्याची घटना राजूर ते जालना रस्त्यावरील बावणेपांगरी फाट्याजवळ शनिवारी दुपारी साडेबारा वाजण्याच्या सुमारास घडली. यात सोमीनाथ जगन इंदलकर (वय२३, रा. इंदलकरवाडी, ता.जि. जालना) असे मयताचे नाव आहे.
सोमीनाथ इंदलकर हा राजूर येथून दुचाकी क्र (एमएच.२१.ईबी.३७३२)ने जालनाकडे जात होता. बावणेपांगरी फाट्याजवळ आल्यावर जालन्याकडून भरधाव वेगाने येणाऱ्या ट्रक क्र. (टीएन.२८.ए.एल.६४९१) ने दुचाकीला जोराची धडक दिली. यात सोमीनाथ इंदलकर हा गंभीर जखमी झाला. त्याला जालना येथील शासकीय रुग्णालयात दाखल केले असता, त्याचा उपचारादम्यान मृत्यू झाला. घटनेची माहिती मिळताच पोलिसांनी घटनास्थळी धाव घेतली. या प्रकरणी पंडित भीमराव इंदलकर यांच्या फिर्यादीवरून चंदनझिरा पोलीस ठाण्यात गुन्हा दाखल करण्यात आला. पुढील तपास पोहेकॉ. चव्हाण हे करीत आहेत. दरम्यान, पोलिसांनी ट्रकचालकास ताब्यात घेतले आहे.