जालना बस स्थानकावरील स्थिती; अपंग, ज्येष्ठांची बस स्थानकात कसरत
जालना : अपंग व ज्येष्ठांना बसस्थानकात ये-जा करण्यासाठी अडचण येऊ नये, यासाठी राज्य परिवहन महामंडळाकडून जालना येथील बस स्थानकात व्हीलचेअरची व्यवस्था करण्यात आली आहे. व्हीलचेअर असतानाही तिचा उपयोग केला जात नसल्याचे ‘लोकमत’ने केलेल्या रिॲलिटी चेकमध्ये समोर आले.
बस स्थानकात प्रवाशांची गर्दी असते. त्यातच पार्किंग ही बस स्थानकापासून दूर असते. अशा परिस्थितीत अपंग व ज्येष्ठ नागरिकांना ये-जा करताना अडचण होऊ नये, यासाठी राज्य परिवहन महामंडळाकडून प्रत्येक बस स्थानकात व्हीलचेअरची व्यवस्था करण्यात आली आहे, परंतु बस स्थानकात असलेल्या व्हीलचेअरचा उपयोग केला जात नसल्याचे ‘लोकमत’ने केलेल्या रिॲलिटी चेकमध्ये समोर आले. ‘लोकमत’च्या प्रतिनिधींनी सोमवारी जालना बस स्थानकाची पाहणी केली असता, ज्येष्ठ व अपंगांना बस स्थानकात प्रवेश करताना मोठी कसरत करावी लागत असल्याचे दिसून आले. जालना बस स्थानकात दररोज ७१ बसेस येतात. या बसेसद्वारे १० ते ११ हजार प्रवासी प्रवास करतात. महामंडळाकडून बस स्थानकात ये-जा करणाऱ्या अपंग व ज्येष्ठ नागरिकांसाठी एका व्हीलचेअरची व्यवस्था करण्यात आली आहे, परंतु या व्हीलचेअरचा उपयोग केला जात नसल्याचे दिसून आले. एका ज्येष्ठ नागरिकाला बस स्थानकात प्रवेश करताना मोठी कसरत करावी लागल्याचे दिसून आले. याबाबत जालना बस स्थानकाचे आगारप्रमुख पंडित चव्हाण यांच्याशी संपर्क साधला असता, ते म्हणाले की, जालना बस स्थानकात एक व्हीलचेअर असून, सध्या बस स्थानकाचे काम सुरू असल्याने सदरील व्हीलचेअरचा उपयोग केला जात नसल्याचे त्यांनी सांगितले.
व्हीलचेअर स्टोअर रूममध्ये
जालना बस स्थानकात एक व्हीलचेअर असून, सध्या या व्हीलचेअरचा उपयोग केला जात नाही. त्यामुळे बस स्थानकातील एका स्टोअर रूममध्ये व्हीलचेअर ठेवण्यात आल्याचे दिसून आले. या व्हीलचेअरची अवस्थाही बिकट असल्याचे दिसून आले. याकडे वरिष्ठ अधिकाऱ्यांनी लक्ष देण्याची गरज आहे.
बस स्थानकात रॅम्प आहे
जालना बस स्थानकाच्या इमारतीचे नूतनीकरण सुरू आहे. बस स्थानकात अपंग व ज्येष्ठ नागरिकांना ये-जा करण्यासाठी रॅम्पची सुविधा करण्यात आली आहे, परंतु व्हीलचेअरचा उपयोग केला जात नसल्याने रॅम्पची सुविधा असूनही फायदा नाही.
माझे शनिमंदिर परिसरात दुकान आहे. मी दररोज बसने ये-जा करतो. अपंग असल्याने मला ये-जा करताना मोठी कसरत करावी लागते. बस स्थानकात व्हीलचेअरची व्यवस्था असते, हे मला तुमच्याकडून समजले. बस स्थानक प्रशासनाने व्हीलचेअरची व्यवस्था करावी.
बळीराम तिडके, अपंग नागरिक
मी शासकीय कामांसाठी जालना येथे येत असतो. वय जास्त असल्याने प्रवास करताना मला मोठा त्रास होतो. बस स्थानकात प्रवाशांची गर्दी असते. बसस्थानकात व्हीलचेअर असूनही उपयोगात नाही. याकडे एस.टी. प्रशासनाने लक्ष देण्याची गरज आहे.
जिजा गायकवाड, बीड
बस स्थानकात दररोज ७१ गाड्या येतात. दररोज १० ते ११ हजार प्रवासी प्रवास करतात. त्यामुळे गर्दी मोठी असते. बस स्थानकात अपंग व ज्येष्ठ नागरिकांसाठी एकच व्हीलचेअर आहे, परंतु बस स्थानकाचे काम सुरू आहे. त्यामुळे व्हीलचेअरचा वापर केला जात नाही.
पंडित चव्हाण, आगारप्रमुख, जालना