चारा छावण्या उभारण्यासाठी शेतकरी संघटनेचे आंदोलन

प्रशासनाकडून दुष्काळग्रस्तासाठी काहीच उपाययोजना करण्यात येत नसल्याचा आरोप करत सोमवारी शेतकरी संघटनेच्या वतीने जिल्हाधिकारी कार्यालयासमोर जनावरांसह धरणे आंदोलन करुन शासनाचा निषेध केला.

लोकमत न्यूज नेटवर्कजालना : शासनाने जिल्ह्यात दुष्काळ जाहीर करुन तीन महिने झाले आहेत. असे असतानाही प्रशासनाकडून दुष्काळग्रस्तासाठी काहीच उपाययोजना करण्यात येत नसल्याचा आरोप करत सोमवारी शेतकरी संघटनेच्या वतीने जिल्हाधिकारी कार्यालयासमोर जनावरांसह धरणे आंदोलन करुन शासनाचा निषेध केला.जिल्ह्यात पर्जन्यमान कमी झाल्याने दुष्काळी परिस्थिती निर्माण झाली आहे. शासनाने प्रशासनाकडून अहवाल मागवून जिल्ह्यात दुष्काळ जाहीर केला आहे. मात्र, लोकसभा निवडणुकीची आचारसंहिता असल्याचे सांगून प्रशासनाकडून दुष्काळी उपाययोजना करण्यास कानाडोळा केला जातो. आता निवडणूक होऊन आठवडा झाला आहे. असे असताना प्रशासनाकडून जनावरांचा चारा, टँकरची व्यवस्था अद्यापही केलेली नाही. ग्रामसेवक, मंडळअधिकारी मुख्यालयी थांबतच नसल्याने कोणाकडे दाद मागावी, अशी स्थिती जिल्ह्यात झाली आहे. प्रशासनाला निवेदन देऊनही या गंभीर बाबीकडे कानाडोळा करण्यात येत असल्याने संतप्त शेतकरी संघटनेच्या पदाधिकाऱ्यांनी रखरखत्या उन्हामध्ये जिल्हाधिकारी कार्यालसमोर जनावरासह आंदोलन केले. जिल्ह्यात मागणी तेथे चारा छावण्या सुरु करण्याची मागणी यावेळी जिल्हाधिकाऱ्यांना निवेदनाव्दारे केली. निवेदनावर आप्पासाहेब कदम, दत्तात्रय कदम, शिवाजी लकडे, डॉ. भागवत काळे, अशोक आटोळे, कृष्णा पिसोरे, शिवाजी तुपे, अंकुश लकडे, मनोहर गात आदींच्या स्वाक्ष-या आहेत.सोलापूर जिल्ह्यात जालना जिल्ह्यासारखी दुष्काळी परिस्थिती नसताना येथील जिल्हाधिका-यांनी अधिकारी कर्मचा-यांना मुख्यालयी थांबण्याचे आदेश दिले आहेत. दिरंगाई केल्यास कडक कारवाईचे संकेत दिले आहेत. जालना जिल्ह्यात दुष्काळी परिस्थितीने जनता होरपळत असताना जिल्हाधिकारी रवींद्र बिनवडे यांनी याकडे लक्ष देऊन तलाठी, ग्रामसेवक, मंडळ अधिकाºयांसह अन्य कर्मचा-यांना मुख्यालयी थांबण्याचे आदेश देण्याची मागणी यावेळी करण्यात आली.