रेल्वे, हवाई प्रवासासह मॉल प्रवेशासाठी घरबसल्या मिळवा युनिव्हर्सल ई-पास !

कोरोनाचा प्रादुर्भाव रोखण्यासाठी प्रयत्न होत आहेत. विविध ठिकाणी प्रवासावरील निर्बंध उठविण्यात आले आहेत. इतर राज्यात जाण्यासाठी, हवाई प्रवासासाठी युनिव्हर्सल पास काढावा लागणार आहे.

सर्वसामान्यांची गैरसोय दूर होण्यास मदत

कोरोनाचा प्रादुर्भाव रोखण्यासाठी प्रशासनाकडून विविध उपाययोजना केल्या जात आहेत. त्यात रेल्वे, हवाई प्रवासासह मॉल प्रवेशात युनिव्हर्सल पास बंधनकारक करण्यात आला आहे. दोन्ही डोस घेतलेल्या नागरिकांना ऑनलाईन पास घेता येणार आहे.- श्रीकांत भुजबळ, तहसीलदार

असा मिळवा ई-पास

१ पात्र नागरिकांनी https://epassmsdma.

mahait.org ही वेब लिंक उघडावी.

२ त्यातील ‘ट्रॅव्हल पास फॉर व्हॅक्सिनेटेड सिटिझन्स’ यावर क्लिक करा.

३ त्यानंतर आपला कोविड लसीकरणासाठी नोंदविलेला मोबाईल क्रमांक नमूद करावा. लगेचच मोबाईलवर ओटीपी अर्थात एकवेळ वापरासाठीचा पासवर्ड लघुसंदेश (एसएमएस) द्वारे प्राप्त होईल.

४ हा ओटीपी नमूद केल्यानंतर लाभधारकाचे नाव, मोबाईल क्रमांक, लाभधारकाचा संदर्भ क्रमांक, आदी तपशील आपोआप समोर दिसतील.

५ त्यामध्ये ‘पास निर्माण करा’ (जनरेट पास) या पर्यायावर क्लिक करावे.

६ त्यावर क्लिक करताच अर्जदाराचा तपशील तसेच कोविड लसीचा पहिला आणि दुसरा डोस घेतल्याचा दिनांक, आदी सर्व तपशील आपोआप दिसेल.

७ या तपशीलमध्ये ‘सेल्फ इमेज’ या पर्यायामध्ये अर्जदाराने स्वतःचे छायाचित्र अपलोड करावे. ते मोबाईल गॅलरीतून अपलोड करता येऊ शकते किंवा मोबाईल कॅमेराद्वारे जागीच छायाचित्र (सेल्फी) काढूनदेखील अपलोड करता येईल.

७ ही सर्व प्रक्रिया पूर्ण झाल्यानंतर २४ तासांमध्ये युनिव्हर्सल ट्रॅव्हल पासकरिता लघुसंदेश (एसएमएस)द्वारे लिंक प्राप्त होईल.

८ लिंक प्राप्त झाल्यानंतर ई-पास मोबाईलमध्ये जतन (सेव्ह) करून ठेवावा.