शी जिनपिंग यांच्या रडारवर का आलं मिंग परिवार? चीनने ११ सदस्यांना फासावर लटकवले

म्यानमार आणि आसपासच्या देशात लाखो लोकांची तस्करी करून त्यांना जबरदस्तीने ऑनलाईन फसवणुकीचे काम दिले जाते. त्यात मोठ्या संख्येने चिनी नागरिकांचा समावेश आहे.

ऑनलाइन फसवणूक आणि बेकायदेशीर जुगार याविरोधात चीनने आतापर्यंत सर्वात मोठी कारवाई केली आहे. चीनने म्यानमारच्या सीमेलगत असलेले स्कॅम सेंटर नेटवर्क चालवणाऱ्या कुख्यात मिंग कुटुंबातील ११ सदस्यांना फासावर लटकवले आहे. या लोकांवर हत्या, अवैध कब्जा, फसवणूक आणि जुगार अड्डे चालवण्यासारखे गंभीर गुन्हे होते. त्यात हे लोक दोषी आढळले. 

ही कारवाई फक्त शिक्षा नाही तर चीनकडून त्या सर्व फसवणूक करणाऱ्या टोळीला थेट इशाराच दिल्याचे बोलले जाते. ज्या टोळ्या दक्षिण पूर्व आशियात पसरल्या आहेत. माहितीनुसार, मिंग कुटुंब म्यानमारच्या उत्तरेकडील शान राज्यात लोकाइंग शहरात सक्रीय सर्वात ताकदवान माफिया कुटुंबापैकी एक होते. कधीकाळी अत्यंत गरीब असलेला हा परिसर मिंग कुटुंबासारख्या काही गॉडफादर टोळीमुळे कॅसिनो, रेड लाइट एरिया आणि फसवणूक करणाऱ्या टोळीचा अड्डा बनला. मिंग कुटुंबातील मुख्य मिंग श्वेचांग होता. जो क्राउचिंग टायगर व्हिला नावाने कुप्रसिद्ध स्कॅम सेंटर चालवायचा. सुरुवातीच्या काळात या कुटुंबाने जुगार आणि वेश्या व्यवसायातून कमाई केली परंतु कालांतराने त्यांनी ऑनलाइन लूट करणे याला मुख्य धंदा बनवला. 

२०२३ साली म्यानमारचे सैन्य आणि जातीय विद्रोही गटात संघर्ष वाढला होता. त्याच काळात मिलिशिया आघाडीने लोकाइंगवर कब्जा केला आणि मिंग कुटुंबातील अनेक सदस्यांना अटक करून चीनला सोपवले होते. त्यानंतर चीनमध्ये या सदस्यांविरोधात खटला सुरू होता. चीनच्या सर्वोच्च न्यायालयात मिंग कुटुंबाने २०१५ ते २०२३ या काळात १० अब्ज युआनहून अधिक अवैध कमाई केल्याचं सिद्ध झाले. या फसवणुकीत १४ चिनी नागरिकांचा मृत्यू झाला आणि अनेक लोक गंभीर जखमी झाले होते. सप्टेंबर महिन्यात कोर्टाने मिंग कुटुंबातील ११ सदस्यांना मृत्यूची शिक्षा सुनावली, जी आता अंमलात आली आहे. त्याशिवाय कुटुंबातील २० हून अधिक सदस्यांना ५ वर्षापासून जन्मठेपेपर्यंत शिक्षा दिली आहे.

म्यानमार आणि आसपासच्या देशात लाखो लोकांची तस्करी करून त्यांना जबरदस्तीने ऑनलाईन फसवणुकीचे काम दिले जाते. त्यात मोठ्या संख्येने चिनी नागरिकांचा समावेश आहे. या स्कॅम सेंटर हिंसा सामान्य बाब आहे. मारहाण, छळ, विजेचा शॉकसारख्या क्रूरतेतून सुटका झालेल्या अनेक पीडितांना त्यांच्यावरील अत्याचाराची कहाणी सांगितली. परंतु चीनने मिंग कुटुंबाला संपवून कठोर संदेश दिला आहे.