ट्रम्प सर्वात शक्तीशाली नाहीत, मोदी आणि जिनपिंग यांची स्थिती त्यांच्या पेक्षाही चांगली! अमेरिकन तज्ज्ञाचा दावा; स्पष्टच बोलले

"राष्ट्राध्यक्ष ट्रम्प हे सर्वात शक्तिशाली नेते नाहीत, तर शी जिनपिंग आणि मोदी अधिक शक्तीशाली आहेत. कारण..."

अमेरिकेतील राजकीय विश्लेषक इयन ब्रेमर यांनी अमेरिकेचे राष्ट्राध्यक्ष डोनाल्ड ट्रम्प, चीनचे राष्ट्राध्यक्ष शी जिनपिंग आणि भारताचे पंतप्रधान नरेंद्र मोदी यांच्या संदर्भात मोठे विधान केले आहे. त्यांनी ट्रम्प यांच्या तुलनेत चीनचे राष्ट्राध्यक्ष शी जिनपिंग आणि भारताचे पंतप्रधान नरेंद्र मोदी हे अधिक सरस असल्याचे म्हटले आहे. महत्वाचे म्हणजे, ट्रम्प सातत्याने टॅरिफच्या माध्यमातून अमेरिकेला नफा मिळवून देणे, युद्ध थांबवणे आणि आपण नोबेलसाठी कसे योगेय व्यक्ती आहोत, यासंदर्भात दावे करत आहेत. 

'इंडिया टुडे'शी बोलताना इयन ब्रेमर म्हणाले, "अमेरिका हा जगातील सर्वात शक्तिशाली देश असला तरी, ट्रम्प यांच्या बाबतीत तसे म्हणता येणार नाही. राष्ट्राध्यक्ष ट्रम्प हे सर्वात शक्तिशाली नेते नाहीत, तर शी जिनपिंग हे अधिक शक्तीशाली आहेत. कारण जिनपिंग यांना मध्यावधी निवडणुकांना सामोरे जावे लागत नाही किंवा त्यांच्याकडे स्वतंत्र न्यायपालिकाही नाही. ट्रम्प तीन वर्षांनंतर पदावर नसतील, मात्र जिनपिंग कायम असतील."

ब्रेमर पुढे म्हणाले, "ट्रम्प माध्यमांचे लक्ष वेधून घेत असले, तरी शी जिनपिंग आणि पंतप्रधान मोदी हे त्यांच्यापेक्षाही अधिक चांगल्या स्थितीत आहेत. मोदींसंदर्भात बोलताना ते म्हणाले, मोदी दीर्घ कार्यकाळामुळे देशात मोठे बदल घडवू शकतात आणि दीर्घकालीन फायदे बघू शकतात. तशी संधी ट्रम्प अथवा युरोपातील नेत्यांना नाही.

मोदींच्या सत्तेतील सातत्य आणि धोरणांमधील स्पष्टता त्यांना युरोपीय नेत्यांच्या तुलनेत अधिक प्रभावीपणे आपली भूमिका मांडण्याची शक्ती देते. त्यांच्या या स्थिरतेमुळेच ते दबावाचा यशस्वीपणे सामना करू शकतात आणि आपण हे गेल्या काही काळात प्रत्यक्षपणे अनुभवले आहे, असेही ब्रेमर यावेळी म्हणाले.