पाकिस्तानमध्ये यावर्षी गाढवांच्या संख्येत मोठी वाढ झाली आहे. पाकिस्तान ब्युरो ऑफ स्टॅटिस्टिक्सच्या अहवालानुसार, गेल्या वर्षीच्या तुलनेत पाकिस्तानमध्ये गाढवांची संख्या १०९०००ने वाढून ६०.८ लाखांहून अधिक झाली आहे. गेल्या वर्षी ही संख्या ५९ लाखांवर होती. तर, चीनमध्ये पाकिस्तानी गाढवांच्या कातडीची आणि मासांची मागणी सतत वाढत आहे. चीनमध्ये गाढवांच्या कातडीचा वापर करून पारंपरिक औषधे बनवली जातात. त्यामुळे चीन पाकिस्तानकडून गाढवांची खरेदी करत आहे. तर, पाकिस्तानने देखील गाढवांच्या उत्पादनात बरीच गुंतवणूक केली आहे.
पाकिस्तानने शिथिल केले कायदे!
पाकिस्तानमध्ये गाढवांच्या संख्येत सलग तिसऱ्या वर्षी वाढ झाली आहे. चीनमधील पारंपरिक हर्बल औषधांमध्ये गाढवाचा वापर केला जातो. गाढवाच्या कातडीपासून बनवलेले इजियाओ नावाचे औषध त्वचा, रक्त, पुरूषांचे लैंगिक आरोग्य आणि प्रजनन आरोग्य समस्यांवर उपचार करण्यासाठी वापरले जाते. गाढवापासून बनणारे हे औषध अतिशय महागडे असून, श्रीमंत वर्गात अतिशय लोकप्रिय आहे. त्यामुळे चीनमध्ये गेल्या काही वर्षात गाढवांची संख्या कमी होताना दिसत आहे. म्हणूनच चीन पाकिस्तानकडून गाढवांची खरेदी करत आहे. पूर्वी पाकिस्तानमध्ये प्राण्यांच्या निर्यातीबाबत काही कठोर कायदे होते. परंतु, जेव्हा चीनमध्ये गाढवांची मागणी वेगाने वाढू लागली, तेव्हा काही नियमांमध्ये शिथिलता देण्यात आली. यामुळे चीनला पाकिस्तानी गाढवे खरेदी करणे खूप सोपे झाले आहे.
चीनमध्ये वाढतेय इजियाओची मागणी!
चीनमध्ये इजियाओच्या वाढत्या मागणीमुळे दरवर्षी लाखो गाढवे मारली जातात. इजियाओची वाढती मागणी पूर्ण करण्यासाठी चीनला दरवर्षी सुमारे ५९ लाख गाढवांची कत्तल करावी लागते. यासाठी चीनने स्वतःचे कत्तलखाने सुरू केले आहेत. गाढवांची वाढती मागणी पूर्ण करण्यासाठी चीन पाकिस्तानवर सतत दबाव वाढवत आहे. चीनमध्ये जवळपास ३००० वर्षांपासून इजियाओचा वापर केला जात आहे. त्यामुळे चीनमध्ये याचे उत्पादन मोठ्या प्रमाणात केले जाते.