हवाई हल्ल्यानंतर तालिबानचा पाकिस्तानी सैन्यावर हल्ला, १५ सैनिक ठार; अनेक प्रांतांमध्ये गोळीबार
By ऑनलाइन लोकमत | Updated: October 12, 2025 12:55 IST2025-10-12T12:54:00+5:302025-10-12T12:55:49+5:30
पाकिस्तान आणि अफगाणिस्तानमधील तणाव वाढतच चालला आहे. राजधानी काबूलसह अफगाणिस्तानमध्ये पाकिस्तानी हवाई हल्ल्यांनंतर, तालिबानी सैन्याने किमान १५ पाकिस्तानी सैनिकांना ठार मारले.
हवाई हल्ल्यानंतर तालिबानचा पाकिस्तानी सैन्यावर हल्ला, १५ सैनिक ठार; अनेक प्रांतांमध्ये गोळीबार
भारत आणि अफगाणिस्तानमधील वाढत्या जवळीकतेमुळे पाकिस्तान अस्वस्थ आहे. अफगाणिस्तानचे परराष्ट्र मंत्री अमीर खान मुत्तकी भारत दौऱ्यावर असताना, पाकिस्तानने राजधानी काबूलसह अफगाण सीमावर्ती भागात हवाई हल्ले सुरू केले. या हल्ल्याला तालिबानने चोख प्रत्युत्तर दिले. प्रत्युत्तरात, हेलमंड प्रांतात किमान १५ पाकिस्तानी सैनिकांचा मृत्यू झाला. तालिबानी सैनिकांनी अनेक पाकिस्तानी चौक्याही ताब्यात घेतल्या. अनेक सीमावर्ती प्रांतांमध्ये हिंसक चकमकी झाल्याची माहिती समोर आली आहे.
“ऑपरेशन ब्ल्यू स्टार चुकीच्या पद्धतीने राबवले, इंदिरा गांधींना किंमत मोजावी लागली”: चिदंबरम
हेलमंड प्रांतीय सरकारचे प्रवक्ते मावलावी मोहम्मद कासिम रियाझ यांनी सांगितले की, बहरामपूरमधील डुरंड रेषेजवळ रात्रीच्या वेळी झालेल्या कारवाईत किमान १५ पाकिस्तानी सैनिक ठार झाले. पाकिस्तानी चौकी ताब्यात घेण्यासोबतच मोठ्या प्रमाणात दारूगोळा आणि शस्त्रेही जप्त करण्यात आली आहेत. पाकिस्तानी हवाई हल्ल्यामुळे दोन्ही देशांमधील तणाव आणखी वाढला. दरम्यान, तालिबानी दहशतवाद्यांनी हेलमंड, कंधार, जाबुल, पक्तिका, पक्तिया खोस्त, नांगरहार आणि कुनार येथे पाकिस्तानी सैनिकांना लक्ष्य करण्यास सुरुवात केली, जे सर्व पाकिस्तान आणि अफगाणिस्तानच्या सीमेवर आहेत.
वृत्तानुसार, अफगाण सैन्याने अनेक पाकिस्तानी चौक्या ताब्यात घेतल्या. कुनार आणि हेलमंडमध्ये प्रत्येकी एक पाकिस्तानी चौकी उद्ध्वस्त करण्यात आली. पक्तिया आणि रब जाजी जिल्ह्यात पाकिस्तानी सैन्य आणि अफगाण सीमा दलांमध्ये भीषण संघर्ष सुरू झाला आहे. तालिबानी दहशतवाद्यांनी पाकिस्तानी सैनिकांकडून शस्त्रेही हिसकावून घेतली आहेत. स्पिना शागा, गिवी, मनी जाभा आणि इतर भागातही युद्ध सुरू झाले आहे.
अफगाणिस्तानने पाकिस्तानला आवाहन केले
९ ऑक्टोबर रोजी पाकिस्तानने काबूल, खोस्त, जलालाबाद आणि पक्तिया येथे टीटीपी प्रमुख नूर अली मेहसूदला लक्ष्य करून हवाई हल्ले केले. दरम्यान, अफगाणिस्तानातील तालिबान सरकारने पाकिस्तानने आपल्या सार्वभौमत्वाचे उल्लंघन केल्याचा दावा केला आहे. भारताला भेट दिलेल्या अफगाणिस्तानचे परराष्ट्र मंत्री मुत्ताकी यांनीही पाकिस्तानला तालिबानच्या संयमाची परीक्षा घेऊ नये असे आवाहन केले.