चर्चेमध्ये घुसून गोळाबार केला अन् नंतर बॉम्बने स्वतःला उडवून दिले; सीरियात २२ जणांचा मृत्यू

सीरियातील चर्चमध्ये झालेल्या दहशतवादी हल्ल्यात २२ जणांचा मृत्यू झाला.

Syria Church Attack: जगात युद्धाचे सावट असताना सीरियाची राजधानी दमास्कसमधील एका चर्चमध्ये आत्मघाती हल्ला करण्यात आला. ज्यामध्ये २२ जणांचा मृत्यू झाला तर ६३ जण जखमी झाले. सीरियाच्या गृहमंत्रालयाने या हल्ल्यासाठी इस्लामिक स्टेट या दहशतवादी गटाला जबाबदार धरले आहे. रविवारच्या दिवशी ग्रीक ऑर्थोडॉक्स सेंट एलियास चर्चेमध्ये प्रार्थना करत असताना हा हल्ला झाला. इस्लामिक स्टेटशी संबंधित एका दहशतवाद्याने चर्चमध्ये प्रवेश करत गोळीबार केला आणि नंतर स्वतःला उडवून दिले.

चर्चेमध्ये झालेला हा हल्ला राजधानीच्या मध्यभागी झाला, जो सीरियन राजवटीचा सर्वात सुरक्षित भाग मानला जातो. भारतीय वेळेनुसार रविवारी रात्री हा हल्ला झाला. प्रत्यक्षदर्शींनी दिलेल्या माहितीनुसार हल्लेखोरासोबत आणकी एक बंदूक घेतलेला व्यक्ती होता. त्याने गर्दीवर गोळीबार केला. त्यावेळी चर्चमध्ये सुमारे १५० ते ३५० लोक उपस्थित होते. स्फोट इतका भीषण होता की चर्चेमध्ये बसवलेले बेंच तुटले. "राजधानी दमास्कसमधील ड्वेला भागातील सेंट इलियास चर्चमध्ये एका आत्मघातकी हल्लेखोराने प्रवेश केला, जो आयसिस दहशतवादी गटाशी संबंधित होता. तिथे त्याने गोळीबार केला आणि नंतर स्फोटकांनी स्वतःला उडवून दिले," असं सीरियाच्या गृहमंत्रालयाने म्हटलं.

मात्र अद्यापही आयएसने या हल्ल्याची जबाबदारी स्वीकारलेली नाही. या स्फोटांमध्ये जखमीं झालेल्यांमध्ये लहान मुले देखील आहेत. स्फोटानंतर लगेचच सुरक्षा कर्मचारी आणि आपत्कालीन बचाव यंत्रणा घटनास्थळी पोहोचली. सीरियाचे सुरक्षा दल हल्ल्याचा तपास करत आहेत आणि चर्च परिसराचा भाग ताब्यात घेण्यात आला आहे.

दरम्यान, गेल्या काही काळात सीरियामध्ये झालेला हा एक मोठा हल्ला आहे. सीरिया अल्पसंख्याक समुदायांशी संबंध मजबूत करण्याचा प्रयत्न करत असतानाच हा हल्ला झाला. सीरियाचे अध्यक्ष अहमद अल-शारा यांनी डिसेंबर २०२४ मध्ये माजी सीरियाचे अध्यक्ष बशर अल-असद यांना पदच्युत केले आणि त्यांच्या जागी इस्लामिक सरकार स्थापन केले. दुसरीकडे, असदच्या पतनानंतर आयएस गट स्वतःला पुन्हा संघटित करण्याचा प्रयत्न करत आहे.