सैनिकांचे मृतदेह, युद्धकैद्यांची अदलाबदल,...; रशिया-युक्रेन यांच्या शांतता बैठकीत काय ठरलं?

तुर्कीमधील या शांतता बैठकीच्या एक दिवस आधी युक्रेनने रशियावर आतापर्यंतचा सर्वात मोठा हल्ला केला आहे.

तुर्कीची राजधानी इस्तांबुलमध्ये २०२२ नंतर रशिया-युक्रेन यांच्यात शांतता चर्चेची बैठक पार पडली. ही बैठक निश्चित वेळेपेक्षा २ तास उशिराने सुरू झाली. त्यानंतर अवघ्या १ तासांत दोन्ही देशामध्ये शांतता चर्चा संपुष्टात आली. या बैठकीत दोन्ही देशांच्या प्रतिनिधींनी आक्रमक पवित्रा घेतला होता. 

शांतता चर्चेत काय झाले?

रशियाचे प्रतिनिधी मेडिंस्की यांनी दिलेल्या माहितीनुसार, रशियाच्या हल्ल्यात मारले गेलेल्या ६ हजार सैनिकांचे मृतदेह युक्रेनला दिले जाणार, जेणेकरून या सैनिकांवर सन्मानाने अंत्यसंस्कार केले जातील. ग्रे झोनच्या माध्यमातून मृतदेह दिले जातील. हे मृतदेह देताना त्या भागात सीजफायर गरजेचा आहे. या बैठकीत २-३ दिवसांपुरता मर्यादित सीजफायर प्रस्ताव करण्यात आला जो काही निवडक परिसरात लागू होईल. त्याशिवाय रशिया-युक्रेन युद्धात १ हजार युद्धकैदी अदलाबदली करण्यावर सहमती झाली. लवकरच ही प्रक्रिया सुरू होईल.

स्थायी समिती स्थापनेवर सहमती

युद्धकैद्यांची देवाणघेवाण करण्यासाठी स्थायी समिती बनवली जाईल. जेणेकरून भविष्यात युद्धकैद्यांची प्रक्रिया वेगाने पूर्ण करता येईल. रशियाकडून तीन प्रमुख भागांचा समावेश असलेला औपचारिक शांतता करार युक्रेनला सुपूर्द करण्यात आला आहे. हा करार दीर्घकालीन शांततेच्या दिशेने एक ठोस पाऊल असू शकते. युक्रेनने हा करार विचाराधीन ठेवला आहे. तर रशियासोबत कुठलाही तोडगा केवळ वरिष्ठ पातळीवर केला जाऊ शकतो. जूनच्या अखेरपर्यंत राष्ट्रपती व्लोडिमिर झेलेन्स्की आणि व्लादीमीर पुतिन यांच्यात थेट बैठक आयोजित केली जाईल असं युक्रेनचे संरक्षण मंत्री रुस्तेम उमेरोव यांनी म्हटलं.

दरम्यान, तुर्कीमधील या शांतता बैठकीच्या एक दिवस आधी युक्रेनने रशियावर आतापर्यंतचा सर्वात मोठा हल्ला केला आहे. युक्रेनने रशियाच्या ४ एअरबेसवर हल्ला केला. ज्यात ४० हून अधिक रशियन बॉम्बर विमाने जळून खाक झाली. रशिया आणि युक्रेन यांच्यात तुर्कीत झालेली शांतता बैठक तुर्कीचे परराष्ट्र मंत्री हाकन फिदान यांच्या अध्यक्षतेखाली पार पडली. या बैठकीकडे अवघ्या जगाचे लक्ष लागून राहिले होते परंतु बैठकी फारसे काही हाती लागले नाही.