नासिरशी निकाहाचा व्हिडीओ व्हायरल होताच पुन्हा गायब झाली सरबजीत कौर; वकिलाने केलं मोठं वक्तव्य! म्हणाला-

पाकिस्तानी माध्यमांनुसार, सरबजीतने नासिरशी निकाह केला असून, त्यांनी धर्म परिवर्तन करून आपले नावही बदलले आहे.

पंजाबमधील कपूरथला येथील ४८ वर्षीय सरबजीत कौर गुरुद्वाराला भेट देण्यासाठी पाकिस्तानला गेल्या होत्या. मात्र, परतताना गायब झाल्यामुळे चर्चेत आल्या होत्या. त्यांचा एक व्हिडीओ सध्या सोशल मीडियावर व्हायरल होत आहे. सरबजीत कौर ४ नोव्हेंबर २०२५ रोजी शीख जत्थ्यासह प्रकाश पर्व साजरा करण्यासाठी पाकिस्तानात गेल्या होत्या. मात्र, त्यांचा पूर्ण ग्रुप भारतात परतल्यावर त्या बेपत्ता असल्याचे आढळले. यामुळे दोन्ही देशांमध्ये मोठी खळबळ माजली होती. आता पुन्हा एकदा त्या गायब झाल्याने नवा वाद रंगला आहे.

सुरुवातीला, सरबजीतच्या निकाहबद्दलचे उर्दूमध्ये लिहिलेले पत्र व्हायरल झाले होते. आता व्हायरल झालेल्या व्हिडीओमध्ये त्या ४३ वर्षीय पाकिस्तानी तरुण नासिर हुसैनसोबत दिसल्या आहेत.

धर्म परिवर्तन करून झाल्या नूर हुसैन

पाकिस्तानी माध्यमांनुसार, सरबजीतने नासिरशी निकाह केला असून, त्यांनी धर्म परिवर्तन करून आपले नावही बदलले आहे. आता सरबजीत कौर धर्म बदलून नूर हुसैन बनल्या आहेत. नवीन व्हायरल व्हिडीओनुसार, ७ नोव्हेंबर २०२५ रोजी सरबजी शेखपुरा येथील दंडाधिकाऱ्यासमोर हजर झाल्या. यावेळी सरबजीत यांनी सांगितले की, "मी नासिरला गेल्या ९ वर्षांपासून ओळखते. मी नासिरवर प्रेम करते आणि माझ्या इच्छेनुसार इस्लाम धर्म स्वीकारला आहे. माझ्यावर कोणीही कोणताही दबाव आणलेला नाही."

पतीसोबत राहण्याची इच्छा व्यक्त

'द एक्सप्रेस ट्रिब्यून'च्या अहवालानुसार, त्यांनी न्यायिक दंडाधिकारी शाहबाज हसन राणा यांच्यासमोर तिच्या पतीसोबत राहण्याची इच्छा व्यक्त केली. शेखपुरा जिल्हा बारचे सदस्य असलेले वकील अहमद हसन पाशा यांनी न्यायालयात तिचे प्रतिनिधित्व केले. आपल्या निवेदनात, कौर यांनी स्पष्ट केले की, त्यांनी स्वतंत्रपणे इस्लाम स्वीकारण्याचा आणि पाकिस्तानी व्यक्तीशी लग्न करण्याचा निर्णय घेतला आहे आणि आता त्यानं पती नासिर हुसैनसोबत राहायचे आहे.

५ नोव्हेंबरला झाला निकाह

रिपोर्टनुसार, सरबजीतने सांगितले की त्यांचा निकाह ५ नोव्हेंबर २०२५ रोजी शेखपुरा जिल्ह्यातील फारूकाबाद येथे झाला. मेहर म्हणून ठरवलेली ₹१०,०००/-ची रक्कम आधीच अदा करण्यात आली आहे. न्यायालयात सादर केलेल्या याचिकेत त्यांनी आपल्यावर कोणताही दबाव नसल्याचे पुन्हा सांगितले आहे आणि त्यांचे नवीन इस्लामिक नाव 'नूर हुसैन' असल्याची पुष्टी केली आहे. विवाह प्रमाणपत्रात त्यांना घटस्फोटित महिला आणि दोन मुलांची आई म्हणून नमूद केले आहे.

घरी लागलेले आहे कुलूप, वकीलही चिंतित

सरबजीत घटस्फोटित असून, अमानीपूर गावात आपल्या दोन मुलांसोबत राहत होत्या. केंद्रीय संस्था आणि पोलिसांनी मुलांची चौकशी केल्यावर त्यांना सरबजीतच्या पाकिस्तानात राहण्याबद्दल माहिती मिळाली. टाइम्स ऑफ इंडियानुसार, तळवंडी चौधरियांचे एसएचओ निर्मल सिंह यांनी सांगितले की, सरबजीत कौरविरुद्ध यापूर्वीही तीन गुन्हे दाखल आहेत.

बीबीसीच्या रिपोर्टनुसार, सरबजीत आणि नासिरचे वकील अहमद हसन पाशा यांनी सांगितले की, हे लग्न शेखपुराच्या संबंधित युनियन कौन्सिलमध्ये नोंदणीकृत झाले आहे. १५ नोव्हेंबर रोजी पाशा यांनी दोघांनाही अधिकारी आणि प्रसारमाध्यमांसमोर स्टेटमेंट देण्यासाठी बोलावले होते, मात्र ते आले नाहीत. आता नासिर हुसैनचा मोबाईल फोनही बंद येत आहे. पाशा यांनी भीती व्यक्त केली आहे की, "हे दोघेही कोणत्याही कायदेशीर कारवाईच्या शक्यतेमुळे घाबरले असावेत."

व्हिसाची मुदत वाढवण्याची प्रक्रिया सुरू

पाशा यांनी पुढे सांगितले की, सरबजीत कौरच्या व्हिसाची मुदत अद्याप वाढलेली नाही आणि त्यांनी या संदर्भात लाहोर उच्च न्यायालयात याचिका दाखल केली आहे. या प्रकरणाची सुनावणी सोमवारी होण्याची अपेक्षा आहे.

शेखपुरा पोलिसांनी दिलेल्या माहितीनुसार, सरबजीत आणि नासिर हुसैनचा शोध घेण्यासाठी अधिकाऱ्यांचे एक पथक फारुखाबादला पाठवण्यात आले होते, परंतु त्यांच्या घराला कुलूप लागले आहे. नासिर हुसैन आणि त्याचे कुटुंब कुठे आहे, हे अद्याप समजू शकलेले नाही. दरम्यान, नासिर आधीच विवाहित असल्याची माहितीही समोर आली आहे.