रशियाच्या बदल्यानं युक्रेन हादरलं! ४०० ड्रोन अन् ४० हून अधिक मिसाईल हल्ल्यानं सगळीकडे विनाश

रशिया त्यांच्या धोरणात बदल करत नाही. तो सर्वसामान्य नागरिकांना टार्गेट करत आहे. आता हे युद्ध केवळ युक्रेनचं राहिले नाही तर मानवतेविरोधात युद्ध आहे असं युक्रेननं म्हटलं.

२०२२ पासून रशिया आणि युक्रेन यांच्यात सुरू असलेले युद्ध २०२५ मध्ये अधिक आक्रमक झालं आहे. काही दिवसांपूर्वी युक्रेनने रशियाच्या ४ एअरबेसवर ड्रोन हल्ले करत त्यांची ४० लढाऊ विमाने उद्ध्वस्त केली होती. आतापर्यंत झालेल्या हल्ल्यांपैकी रशियातील हा हल्ला सगळ्यात मोठा होता. त्यामुळे याचा बदला घेणारच असा पवित्रा पुतिन यांनी घेतला. आता रशियाने युक्रेनच्या सर्व प्रमुख परिसरात ४०० हून अधिक ड्रोन आणि ४० हून जास्त बॅलेस्टिक मिसाईलने प्रतिहल्ला केला आहे. रशियाने केलेल्या या हल्ल्याने युक्रेन हादरले आहे.

रशियाने ज्या भागावर हल्ला केला त्यात वोलिन, लविव, टेरनोपिल, किव, सुमी, पोल्टावा, खमेलनित्सकी, चर्कासी, चेर्निहिव यांचा समावेश आहे. युक्रेनचे राष्ट्रपती झेलेन्स्की यांनी ट्विट करून रशियाच्या हल्ल्याविरोधात युक्रेनी हवाई दलाने अनेक मिसाईल, ड्रोन नष्ट केले आहेत परंतु या हल्ल्यात ३ आपत्कालीन सेवा कर्मचाऱ्यांचे मृत्यू आणि ४९ हून अधिक लोक जखमी आहेत. मलबा हटवण्याचं काम सुरू असून बचाव पथकांनी शोध मोहिम हाती घेतली आहे असं त्यांनी सांगितले. 

तसेच रशिया त्यांच्या धोरणात बदल करत नाही. तो सर्वसामान्य नागरिकांना टार्गेट करत आहे. आता हे युद्ध केवळ युक्रेनचं राहिले नाही तर मानवतेविरोधात युद्ध आहे. आंतरराष्ट्रीय व्यासपीठावर रशियाला जबाबदार धरले पाहिजे. अमेरिका, युरोप आणि संपूर्ण जगाला आता निर्णायक दबाव बनवावा लागेल. जर जागतिक नेते गप्प बसले तर तेदेखील यात सामील असतील. आता निर्णायक पाऊले उचलण्याची वेळ आली आहे. केवळ समर्थनाने युद्ध थांबणार नाही असंही वोलोदिमिर झेलेन्स्की यांनी म्हटलं.

Russia doesn`t change its stripes – another massive strike on cities and ordinary life. They targeted almost all of Ukraine – Volyn, Lviv, Ternopil, Kyiv, Sumy, Poltava, Khmelnytskyi, Cherkasy, and Chernihiv regions. Some of the missiles and drones were shot down. I thank our… pic.twitter.com/O1iemSp3s2

— Volodymyr Zelenskyy / Володимир Зеленський (@ZelenskyyUa) June 6, 2025

रशिया-युक्रेनवर जागतिक भूमिका 

युक्रेनने सुरूवातीपासून हे स्पष्ट केले आहे की, ते एकटे लढून लढून थकले आहेत. त्यांनी नाटो, युरोपीय संघ, अमेरिका आणि इतर देशांकडून रशियावर आणखी कठोर आर्थिक निर्बंध लावण्याची मागणी करत शस्त्रे, सैन्य मदत पुरवा असं म्हटलं आहे. युक्रेनला रशियाविरोधात युद्धात अनेकांनी मदत केली आहे. अमेरिकेकडून सातत्याने सुरक्षा पॅकेज दिले जात आहे. युरोपने एडवान्स डिफेन्स एअर सिस्टम देण्यात आली आहे. नाटो देशांनी सीमेवर चोख देखरेख ठेवली आहे. तरीही या युद्धात ठोस मदत मिळत नसल्याची भावना झेलेन्स्की यांची आहे. २०२२ पासून आतापर्यंत रशिया आणि यु्क्रेनचे हजारो लोक मारले गेलेत. लाखो लोक विस्थापित झालेत. युक्रेनची अर्थव्यवस्था ढासळली आहे.