America Entry in Israel Iran War:इस्रायल-इराण यांच्यात पेटलेल्या युद्धात अमेरिकेने उडी घेतली. इराणचा आण्विक कार्यक्रम रोखण्यासाठी इस्रायलने सुरू केलेल्या हल्ल्यांदरम्यान अमेरिकेने इराणच्या तीन आण्विक केंद्रांवर बंकर बस्टर बॉम्बनी हल्ला केला. यानंतर आता इराणने कतारमधील अमेरिकेच्या तळांवर ६ क्षेपणास्त्रे डागली आहेत. यानंतर आता कतार, बहरीन, कुवेत यांनी आपले एअरस्पेस बंद केले आहेत. इराणने प्रत्युत्तरादाखल केलेल्या हल्ल्यांमुळे आखाती देशांतील तणाव वाढण्याची शक्यता वर्तवली जात आहे. यातच इराणने केलेल्या हल्ल्याचा कतारने निषेध नोंदवला.
कतारच्या परराष्ट्र मंत्रालयाचे मंत्री आणि अधिकृत प्रवक्ते मजेद अल अन्सारी यांनी एक्सवर एक दीर्घ पोस्ट करत इराण केलेल्या हल्ल्याचा तीव्र शब्दांत निषेध केला. आम्ही हे कृत्य कतारचे सार्वभौमत्व, हवाई क्षेत्र, आंतरराष्ट्रीय कायद्याचे आणि संयुक्त राष्ट्रांच्या नियमांचे उघड उल्लंघन मानतो. आम्ही पुष्टी करतो की, आंतरराष्ट्रीय कायद्यानुसार याला थेट प्रत्युत्तर देण्याचा अधिकार कतार राखून ठेवतो. कतारच्या हवाई संरक्षण दलांनी हल्ला यशस्वीरित्या हाणून पाडला आणि इराणी क्षेपणास्त्रे हवेतच रोखली. या हल्ल्यात कोणलाही दुखापत किंवा जीवितहानी झाली नाही याची आम्ही पुष्टी करतो, असे कतारने म्हटले आहे. कतारसह सौदी अरेबियाच्या परराष्ट्र मंत्रालयानेही इराण हल्ल्याचा निषेध केला आहे.
कतारमधील भारतीय दूतावासाने केले महत्त्वाचे आवाहन
सध्याच्या परिस्थिती लक्षात घेता, कतारमधील भारतीय समुदायाला सावधगिरी बाळगण्याचे आणि घरातच राहण्याचे आवाहन कतार दोहा येथील भारतीय दूतावासाने केले आहे. कृपया शांत राहा आणि कतारच्या अधिकाऱ्यांनी दिलेल्या स्थानिक बातम्या, सूचना आणि मार्गदर्शनाचे पालन करा. भारतीय दूतावास सोशल मीडिया चॅनेलद्वारे घडामोडींबाबत अपडेट करत राहील, असेही कतारमधील दोहा येथील भारतीय दूतावासाच्या अधिकृत एक्स अकाउंटवर पोस्ट करण्यात आले आहे. दुसरीकडे, काही रिपोर्ट्सनुसार, कतार येथील अमेरिकन लष्करी तळांवर इराणने केलेल्या हल्ल्यानंतर इराणमधील स्थानिकांकडून जल्लोष करण्यात आला.
दरम्यान, भारतातील अहमदाबाद, लखनऊ यांसह अनेक विमानतळांनी या घडामोडींच्या पार्श्वभूमीवर प्रवाशांसाठी मार्गदर्शक सूचना जारी केल्या आहेत. तसेच एअर इंडिया, इंडिगो, अकासा एअरलाइन अशा विमान कंपन्यांनीही प्रवाशांसाठी सूचना जारी केल्या आहेत. कतार एअरवेजकडूनही सहकार्याचे आवाहन प्रवाशांना करण्यात आले आहे.