ट्रम्प यांच्या हत्येचा कट उघड! इराणी डेथ स्क्वॉडचा पाकिस्तानी हस्तक अमेरिकेत दोषी; खळबळजनक खुलासा

अमेरिकन सुरक्षा यंत्रणांची मोठी कारवाई, आसिफ मर्चंटचा डाव उधळला

Asif Merchant: अमेरिकेचे राष्ट्राध्यक्ष डोनाल्ड ट्रम्प आणि इतर बड्या नेत्यांच्या हत्येचा कट रचल्याप्रकरणी पाकिस्तानी नागरिक आसिफ मर्चंट याला अमेरिकेतील न्यायालयाने दोषी ठरवले आहे. इराणच्या सांगण्यावरून हा कट आखण्यात आला होता, असा खळबळजनक दावा अमेरिकेच्या न्याय विभागाने शुक्रवारी केला आहे.

काय होता नेमका कट?

२०२० मध्ये अमेरिकेने केलेल्या कारवाईत इराणचे लष्करी कमांडर कासिम सुलेमानी मारले गेले होते. या हत्येचा बदला घेण्यासाठी इराणने अमेरिकेतील महत्त्वाच्या नेत्यांना संपवण्याची योजना आखली होती. या योजनेनुसार आसिफ मर्चंट याने २०२४ मध्ये अमेरिकेत जाऊन यासाठी माणसे गोळा करण्याचा प्रयत्न केला होता.
डोनाल्ड ट्रम्प, जो बायडेन, निक्की हेली आरोपीच्या लक्ष्यावर होत्या.

इराणी गुप्तचर यंत्रणेचा हात? 

फेडरल प्रॉसिक्युटर्सच्या म्हणण्यानुसार, हा संपूर्ण कट इराणच्या इस्लामिक रिव्होल्युशनरी गार्ड कॉर्प्स या एलिट दलाने आखला होता. आसिफ मर्चंटवर पैशांसाठी हत्या आणि आंतरराष्ट्रीय दहशतवाद पसरवण्याचा प्रयत्न केल्याचे शिक्कामोर्तब करण्यात आले आहे. एप्रिल २०२४ मध्ये आसिफ मर्चंटने या कामात मदत करण्यासाठी एका व्यक्तीशी संपर्क साधला होता. मात्र, त्या व्यक्तीने वेळीच अमेरिकन सुरक्षा यंत्रणांना सावध केले आणि तो स्वतः गुप्त खबऱ्या बनला. यामुळे मर्चंटचा डाव फसला आणि कोणताही हल्ला होण्यापूर्वीच त्याला अटक करण्यात आली.

आरोपीचा बचावात्मक पवित्रा 

न्यूयॉर्कमधील ब्रुकलिन न्यायालयात सुरू असलेल्या सुनावणी दरम्यान मर्चंटने कबुली दिली की, त्याने रिव्होल्युशनरी गार्ड्सच्या सदस्यांशी हातमिळवणी केली होती. मात्र, त्याने असा दावा केला की, तेहरानमध्ये असलेल्या आपल्या कुटुंबाच्या संरक्षणासाठी दबावाखाली त्याने हे पाऊल उचलले होते. आपल्याला कोणत्याही विशिष्ट व्यक्तीला मारण्याचा थेट आदेश मिळाला नव्हता, असेही त्याने न्यायालयात सांगितले.

युद्धाच्या सावटाखालील खटला हा खटला अशा वेळी समोर आला आहे जेव्हा इराण, अमेरिका आणि इस्रायल यांच्यात युद्ध पेटले आहे. इराणच्या राजदूतांच्या मते, नुकत्याच झालेल्या हल्ल्यात १,३३२ नागरिकांचा मृत्यू झाला आहे. इराणचे सर्वोच्च नेते अली खामेनेई यांच्यासह अनेक बड्या नेत्यांच्या मृत्यू झाला आहे. दुसरीकडे कुवेतमध्ये झालेल्या हल्ल्यात सहा अमेरिकन सैनिक मारले गेले आहेत, तर इस्रायलमध्ये १० नागरिकांचा मृत्यू झाला आहे.