America Strikes In Iran:इराण आणि इस्रायलमध्ये सुरू असलेल्या युद्धात आता अमेरिकेने सहभाग घेतला आहे. दोन आठवड्यांचा इशारा देणाऱ्या अमेरिकेचे अध्यक्ष डोनाल्ड ट्रम्प यांनी इराणच्या तीन प्रमुख अणऊर्जा प्रकल्पांना लक्ष्य केले. अमेरिकेच्या लढाऊ विमानांनी फोर्डो, नतान्झ आणि इस्फहान या अणुऊर्जा प्रकल्पांवर हल्ला केला आणि त्यांना नष्ट केले अशी माहिती डोनाल्ड ट्रम्प यांनी दिली. आता अमेरिकेच्या हल्ल्यात कोणतेही नुकसान झालेले नसल्याचे इराणने म्हटलं आहे.
इराण आणि इस्रायलच्या १० दिवसांच्या युद्धानंतर अमेरिकेने इराणवर हल्ला करत तीन अणुऊर्जा प्रकल्पांना लक्ष्य केले. यामध्ये फोर्डो, नतान्झ आणि एस्फहान प्रकल्पांचा समावेश आहे. या हल्ल्यानंतर अमेरिकेचे राष्ट्राध्यक्ष डोनाल्ड ट्रम्प यांनी पत्रकार परिषद घेत माहिती दिली. ज्यामध्ये त्यांनी हल्ल्याबद्दल अमेरिकन सैन्याचे अभिनंदन केले. दुसरीकडे इराणने या हल्ल्यानंतर निवेदन जारी करुन अणुऊर्जा प्रकल्प सुरक्षित असल्याचे म्हटलं आहे.
अमेरिकेच्या हवाई हल्ल्यांनंतर नागरिकांसाठी कोणताही धोका नसल्याचे इराणच्या सरकारी माध्यमांनी म्हटले आहे. अमेरिकेच्या हल्ल्यामुळे अणुऊर्जा प्रकल्पांचे कोणतेही नुकसान झालेले नाही आणि नागरिकांना रेडिएशनचा धोका नाही, असं इराणने म्हटलं आहे. मात्र ट्रम्प यांनी आपल्या भाषणात हा हल्ला यशस्वी झाल्याचे म्हटलं होतं. तसेच त्यांनी इशारा देत इराणला शांततेकडे वाटचाल करण्यास सांगितले.
दुसरीकडे, अमेरिकेने अणुप्रकल्पांवर केलेल्या हल्ल्यानंतर सौदी अरेबिया किंवा इतर आखाती देशांमधल्या वातावरणात कोणतेही किरणोत्सर्गी पदार्थ आढळले नसल्याचे सौदी अरेबियाने म्हटले. अणुप्रकल्पांजवळ राहणाऱ्या रहिवाशांना कोणताही धोका नसल्याचे सौदीकडून सांगण्यात आलं.
दरम्यान, इस्रायल आणि इराणमधील सुरू असलेल्या संघर्षाला १० दिवस उलटले आहेत. १३ जूनपासून इराणमध्ये ६५७ लोकांचा मृत्यू झाला आहे आणि २००० हून अधिक लोक जखमी झाले आहेत. तर इराणच्या आरोग्य मंत्रालयाने ४३० नागरिकांचा मृत्यू आणि ३,५०० लोक जखमी झाल्याची माहिती दिली आहे. दुसरीकडे, इस्रायलमध्ये २४ लोकांचा मृत्यू झाला आहे, तर ९०० हून अधिक लोक जखमी झाले आहेत.