बुशहर अणुभट्टीवर इस्रायली हल्ला! रशियाची मोठी माघार; रशियन तज्ज्ञांचे तातडीने स्थलांतर

इराणमधील बुशहर अणुऊर्जा प्रकल्पावर इस्रायलने हल्ला केल्यानंतर रशियाने आपल्या वैज्ञानिकांना बाहेर काढले आहे.

मध्य आशियात सुरू असलेल्या युद्धाने आता अत्यंत भयानक वळण घेतले आहे. इराणमधील बुशहर अणुऊर्जा प्रकल्पावर इस्रायलने केलेल्या ताज्या हल्ल्यानंतर रशियाने मोठे पाऊल उचलले आहे. बुशहरमधील परिस्थिती अत्यंत धोकादायक बनली असून, रशियाने तेथे कार्यरत असलेल्या आपल्या कर्मचाऱ्यांना आणि वैज्ञानिकांना तातडीने बाहेर काढण्यास सुरुवात केली आहे. रशियाची सरकारी अणुसंस्था 'रोसाटॉम'चे प्रमुख अलेक्सी लिखाचेव यांनी या वृत्ताला दुजोरा दिला असून, ही परिस्थिती नियंत्रणाबाहेर जात असल्याची भीती व्यक्त केली आहे.

रिअॅक्टरच्या अगदी जवळ पडले क्षेपणास्त्र

मंगळवारी संध्याकाळी एक क्षेपणास्त्र बुशहर प्रकल्पातील सक्रिय रिअॅक्टर युनिटच्या अगदी जवळ येऊन पडले. सुदैवाने, या हल्ल्यात कोणतीही जीवितहानी झाली नाही किंवा अणुभट्टीचे मोठे नुकसान झाले नाही. मात्र, १८०°C पेक्षा जास्त उष्णता आणि रेडिएशनचा धोका असलेल्या या परिसरात अशा प्रकारचा हल्ला होणे म्हणजे मोठ्या जागतिक संकटाला निमंत्रण असल्याचे तज्ज्ञांचे म्हणणे आहे. यापूर्वी १७ मार्च रोजीही असाच एक प्रयत्न झाला होता.

रशियन नागरिकांचे रेस्क्यू ऑपरेशन सुरू

अलेक्सी लिखाचेव यांनी दिलेल्या माहितीनुसार, रशियाने आपल्या कर्मचाऱ्यांना बाहेर काढण्यासाठी तीन टप्प्यांची योजना आखली आहे. आज सकाळी रशियन कर्मचाऱ्यांचा पहिला गट रस्तेमार्गे इराण-आर्मेनिया सीमेकडे रवाना झाला आहे. लवकरच आणखी दोन गट इथून बाहेर काढले जातील. जोपर्यंत इराणमधील परिस्थिती शांत होत नाही, तोपर्यंत या प्लांटमध्ये केवळ नावापुरतेच रशियन तज्ज्ञ उपस्थित राहतील.

इराणमध्ये रक्ताचा सडा

गेल्या २८ फेब्रुवारीपासून अमेरिका आणि इस्रायलने इराणवर हवाई हल्ल्यांचा मोठा धडाका लावला आहे. या भीषण युद्धात आतापर्यंत १,३४० हून अधिक लोकांचा मृत्यू झाला आहे. सर्वात खळबळजनक बाब म्हणजे, इराणचे सर्वोच्च नेते अली खामेनेई यांचाही या हल्ल्यात मृत्यू झाला. इराणनेही याला प्रत्युत्तर म्हणून इस्रायल, जॉर्डन आणि इराकमधील अमेरिकन लष्करी तळांवर ड्रोन आणि क्षेपणास्त्रांचा वर्षाव केला आहे.

जागतिक बाजारपेठेवर युद्धाचे सावट

या युद्धामुळे जागतिक बाजारपेठ कोसळली असून विमान वाहतूक सेवेवरही मोठा परिणाम झाला आहे. आंतरराष्ट्रीय अणुऊर्जा एजन्सीचे महासंचालक राफेल ग्रॉसी यांच्याशी रशियाने चर्चा केली असून, अणू प्रकल्पाला धोका निर्माण झाल्यास त्याचे परिणाम संपूर्ण जगाला भोगावे लागतील, असा इशारा रशियाने दिला आहे.