कुंपणच शेत खात होतं... इस्रायलच्या सैनिकांनी युद्धाच्या वेळेत हमासला विकले आयफोन, बॅटऱ्या

Israel vs Hamas gaza war smuggling case: इस्रायल आणि हमास यांच्यात गाझापट्टीत दीर्घकाळापासून युद्ध सुरु आहे

Israel vs Hamas gaza war smuggling case: इस्रायलच्या न्याय मंत्रालयाने गाझामध्ये एका मोठ्या बेकायदेशीर तस्करी नेटवर्कचा पर्दाफाश केला आहे. राज्य अभियोक्तांच्या (state prosecutor) म्हणण्यानुसार, या प्रकरणात जवळजवळ एक डझन लोकांवर आरोप ठेवण्यात आले आहेत, ज्यात इस्रायली सैनिक आणि राखीव दलाचे सदस्य यांचा समावेश आहे. असा आरोप आहे की या व्यक्तींनी युद्धादरम्यान गाझामध्ये लाखो डॉलर्सच्या वस्तूंची तस्करी करून कायदा मोडला. तसेच शत्रू संघटना हमासलाही मदत केली.

सीमेवरील देखरेखीत त्रुटी

इस्रायली अभियोक्त्याने जारी केलेल्या निवेदनात म्हटले आहे की आरोपींनी सिगारेट, आयफोन, बॅटरी, कम्युनिकेशन केबल्स आणि कारचे सुटे भाग यासारख्या वस्तू गाझामध्ये तस्करी केल्या. हा माल हमास आणि त्यांच्या सैनिकांपर्यंत पोहोचू शकतो हे जाणून त्यांनी वस्तूंची तस्करी केल्याचा आरोप आहे. स्थानिक माध्यमांच्या वृत्तानुसार, इस्रायल-गाझा सीमेवरील कमकुवत देखरेखीमुळे ही तस्करी शक्य झाली. इस्रायली वृत्तपत्र हारेत्झने दावा केला आहे की या कारवाईत जवान आणि राखीव सैनिकांचा सहभाग होता. महत्त्वाचे म्हणजे, युद्धादरम्यान गाझामध्ये मानवतावादी मदत देखील कडकपणे नियंत्रित करण्यात आली. हमासला फायदेशीर म्हणून अनेक वस्तूंवर बंदी घालण्यात आली. पण इस्रायलच्या सैनिकांनी पैसे कमवण्यासाठी तस्करी करून माल विकला.

सीलबंद ट्रक गेम

असोसिएटेड प्रेसने मिळवलेल्या गाझा चेंबर ऑफ कॉमर्सच्या माहितीतून असे दिसून आले की, अधिकृत क्रॉसिंग सिस्टमच्या बाहेरील अज्ञात इस्रायली संपर्कांद्वारे समन्वय साधला गेला आणि सीलबंद इस्रायली ट्रकद्वारे उच्च किमतीच्या वस्तू गाझामध्ये नेल्या जात होत्या. अहवालानुसार, प्रति शिपमेंट बेकायदेशीर शुल्क लाखो डॉलर्सपर्यंत पोहोचू शकते.

शिन बेट प्रमुखाच्या भावाचे नाव

शिन बेट (इस्रायलची देशांतर्गत गुप्तचर संस्था) चे प्रमुख डेव्हिड झिनी यांचा भाऊ बेझालेल झिनी यांचे नाव सरकारी वकिलांनी घेतल्यावर या खटल्याला आणखी गती मिळाली. लाचेच्या बदल्यात त्याने सिगारेट तस्करीला मदत केल्याचा आरोप आहे. तसेच, बेझालेल झिनीवर अद्याप औपचारिक आरोप लावण्यात आलेले नाहीत. त्यांच्या वकिलाने सर्व आरोप फेटाळून लावले आहेत. अभियोक्ता कार्यालयाने आरोपीची वाहने, स्थावर मालमत्ता आणि रोख रक्कम यासह मालमत्ता जप्त करण्याची मागणी केली आहे. या खटल्यामुळे इस्रायलच्या सुरक्षा व्यवस्था, लष्करी जबाबदारी आणि युद्धकाळातील भ्रष्टाचारावर गंभीर प्रश्न उपस्थित होतात.