एकीकडे डोनाल्ड ट्रम्प यांची 'बोंबाबोंब', दुसरीकडे रशियाने मात्र थेट इराणसोबत केला अणू करार

Russia Iran : तेहरानजवळ ८ अणुऊर्जा प्रकल्प बांधले जाणार

Russia Iran : रशिया आणि इराण यांच्यात आज इराणमध्ये लहान अणुऊर्जा प्रकल्प बांधणी संदर्भात महत्त्वाचा करार करण्यात आला. बुधवारी मॉस्कोमध्ये रशियन अणुऊर्जा एजन्सी रोसाटॉमचे प्रमुख अलेक्सी लिखाचेव्ह आणि इराणचे अणुऊर्जा प्रमुख मोहम्मद इस्लामी यांनी या करारावर स्वाक्षरी केली. रोसाटॉमने या प्रकल्पाचे वर्णन धोरणात्मक करार असे केले. इराणचे उपाध्यक्ष मोहम्मद इस्लामी यांनी सांगितले की, इराण २०४० पर्यंत २० गिगावॅट अणुऊर्जा निर्मितीची योजना आखत आहे. हे साध्य करण्यासाठी, आठ नवीन अणुऊर्जा प्रकल्प उभारण्यात येतील. त्यापैकी चार बुशेहरच्या दक्षिणेकडील प्रांतात असतील. यामुळे इराणला उन्हाळ्याच्या आणि जास्त वापराच्या महिन्यांमध्ये वीजटंचाईपासून मुक्तता मिळेल.

सध्या इराणमध्ये फक्त एकच अणुभट्टी कार्यरत

सध्या इराणमध्ये दक्षिणेकडील बुशेहर शहरात असलेला फक्त एकच कार्यरत अणुऊर्जा प्रकल्प आहे. तो रशियाने बांधला होता आणि त्याची क्षमता १ गिगावॅट आहे. रशिया आणि इराणचे संबंध मजबूत आहेत. अमेरिका आणि इस्रायलने इराणी अणुसुत्रांवर केलेल्या हल्ल्यांवर रशियाने टीका केली आहे. १३ जून रोजी इस्रायलने इराणी अणुसुत्रांवर आणि लष्करी तळांवर हवाई हल्ले केले. या हल्ल्यात इराणी लष्कराचे वरिष्ठ कमांडर आणि अणुशास्त्रज्ञांसह १,००० हून अधिक लोक मारले गेले. इराणने क्षेपणास्त्र आणि ड्रोन हल्ल्यांनी प्रत्युत्तर दिले, ज्यामध्ये डझनभर इस्रायली ठार झाले. अमेरिकेनेही इराणी अणुस्थळांवर बॉम्बहल्ला केला. इराणचा असा दावा आहे की त्यांचा अणुकार्यक्रम पूर्णपणे शांततापूर्ण आहे.

युरेनियमचे साठे ढिगाऱ्याखाली गाडले गेले: इराण

११ सप्टेंबर रोजी इराणचे परराष्ट्र मंत्री अब्बास अराघची यांनी कबूल केले की, इस्रायल आणि अमेरिकेच्या हल्ल्यांनंतर इराणचा उच्च दर्जाचा युरेनियम साठा ढिगाऱ्याखाली गाडला गेला आहे. संयुक्त राष्ट्रांच्या अणुऊर्जा निगरानी संस्थेने इराणच्या समृद्ध युरेनियम साठ्याला गंभीर चिंतेचा विषय म्हणून वर्णन केले आहे अशा वेळी अराघची यांनी हे विधान केले. जूनमध्ये इराणच्या अणुसुत्रांवर झालेल्या हल्ल्यांपासून इराणच्या हालचालींबद्दल त्यांच्याकडे कोणतीही माहिती नसल्याचे एजन्सीने म्हटले आहे.