भारताला डिवचण्याचा प्रयत्न; मोहम्मद युनूस यांनी पाकिस्ताननंतर तुर्कीला दिला वादग्रस्त नकाशा

भारताचा भाग बांग्लादेशात दाखवला; दोन्ही देशातील संबंध बिघडणार..!

India Bangladesh : बांग्लादेशातील हंगामी सरकार सध्या भारताविरुद्ध आपली भूमिका अधिक तीव्र करण्याच्या तयारीत दिसते. सरकारचे प्रमुख मोहम्मद युनूस यांनी आधी पाकिस्तानला आणि आता तुर्कीच्या संसदीय प्रतिनिधीमंडळाला एक वादग्रस्त ‘आर्ट ऑफ ट्रायम्फ’ भेंट दिला आहे. यात भारताचा ईशान्य भाग बांग्लादेशात दाखवण्यात आला असून, यामुळे तीव्र राजनैतिक वाद निर्माण झाला आहे.

तुर्कीला दिला वादग्रस्त नकाशा

मिळालेल्या माहितीनुसार, बांग्लादेशकडून हा नकाशा जाणूनबुजून तयार करून सादर करण्यात आला आहे. ही केवळ कलात्मक कृती नव्हती, तर आंतरराष्ट्रीय इस्लामी राष्ट्रांना भारतविरोधी संदेश देण्याचा प्रयत्न होता. मोहम्मद युनूस यांनी तुर्की प्रतिनिधीमंडळाला दिलेल्या दस्तऐवजांमध्ये भारतासोबत संभाव्य युद्ध आणि त्यानंतरच्या योजनांचा उल्लेख असल्याचे समजते. सध्या भारत सरकार या घडामोडींवर लक्ष ठेवून आहे.

तुर्कीचा उद्देश... 

या संपूर्ण प्रकरणाची वेळ अत्यंत महत्त्वाची मानली जाते. तुर्की, दक्षिण आणि आग्नेय आशियात इस्लामी देशांसोबत लष्करी सहकार्य आणि ड्रोन तंत्रज्ञान हस्तांतरणाच्या माध्यमातून आपला प्रभाव वाढवण्याचा प्रयत्न करत आहे. साल 2024 च्या सुरुवातीपासून तुर्कीने बांग्लादेशशी संबंध सुधारण्याची मोहीम सुरू केली असून, त्याअंतर्गत संरक्षण उद्योग सहकार्य व तंत्रज्ञानात गुंतवणुकीच्या ऑफर दिल्या जात आहेत.

आयएसआयचे नवे ठिकाण बनतोय बांग्लादेश

1971 नंतर प्रथमच बांग्लादेश आणि पाकिस्तान पुन्हा जवळ येत असल्याचे संकेत मिळत आहेत. ढाका आता पाकिस्तानच्या गुप्तचर संस्था आईएसआयसाठी (ISI) नवे केंद्र बनत असल्याची माहिती सुरक्षा यंत्रणांकडून मिळते. अलीकडेच पाकिस्तानच्या वरिष्ठ लष्करी अधिकाऱ्याने बांग्लादेशला भेट दिली, ज्यात आईएसआयचा प्रमुख आणि बांग्लादेशच्या डीजीएफआयचे अधिकारी उपस्थित होते. दोन्ही देशांमध्ये गुप्तचर माहितीची देवाणघेवाण सुरू ठेवण्याबाबत चर्चा आहे. 

भारताची करडी नजर

भारताने या हालचालींवर करडी नजर ठेवण्यास सुरुवात केली आहे. भारतीय गुप्तचर यंत्रणा या घटनांना “भारतविरोधी भू-राजनैतिक खेळी” मानत आहेत. मोहम्मद युनूस यांच्या हंगामी सरकारच्या धोरणांनी ढाका-नवी दिल्ली संबंधांमध्ये तणाव वाढण्याची शक्यता व्यक्त केली जात आहे.