'अमेरिकेने हल्ला केला तर याद राखा!'; इराणच्या धमकीने ट्रम्प यांची झोप उडाली, आखातात युद्धाचे ढग?

जागतिक राजकारणात सध्या इराण आणि अमेरिका यांच्यातील संघर्ष शिगेला पोहोचला आहे. अमेरिकेने इराणवर नव्याने लादलेल्या आर्थिक निर्बंधांमुळे चिडलेल्या इराणने थेट वॉशिंग्टनला युद्धाची धमकी दिली आहे. "जर अमेरिकेने इराणवर हल्ला करण्याचे धाडस केले, तर मध्यपूर्वेतील सर्व अमेरिकन सैन्य तळांना आम्ही उद्ध्वस्त करू," असा इशारा इराणचे परराष्ट्र मंत्री अब्बास अराघची यांनी दिला आहे. या धमकीमुळे राष्ट्राध्यक्ष डोनाल्ड ट्रम्प यांच्यासमोरील अडचणी वाढण्याची शक्यता आहे.

चर्चेच्या दुसऱ्याच दिवशी ठिणगी

विशेष म्हणजे, ओमानच्या मध्यस्थीने शुक्रवारी उभय देशांमध्ये सकारात्मक चर्चा झाली होती. अणू कराराबाबत अप्रत्यक्ष चर्चा सुरू ठेवण्यावर दोन्ही देशांचे एकमत झाले होते. मात्र, त्यानंतर अवघ्या २४ तासांत अराघची यांनी हे आक्रमक विधान केल्याने चर्चेच्या यशावर प्रश्नचिन्ह उपस्थित झाले आहे. अराघची यांनी स्पष्ट केले की, आमचा हल्ला त्या देशांवर नसेल जिथे अमेरिकन तळ आहेत, तर आमचे लक्ष्य केवळ अमेरिकन सैन्य असेल.

ट्रम्प यांची डेडलाईन आणि निर्बंध

डोनाल्ड ट्रम्प यांनी मध्यपूर्व भागात अमेरिकन नौदलाची तैनात वाढवण्याचे आदेश दिले आहेत. तसेच, इराणने युरेनियम संवर्धन तातडीने थांबवावे, अन्यथा परिणाम भोगण्यास तयार राहावे, अशी तंबी दिली आहे. अमेरिकेचा आरोप आहे की इराण परमाणू अस्त्रे बनवण्याच्या तयारीत आहे. यासोबतच इराणने आपला बॅलिस्टिक क्षेपणास्त्र कार्यक्रम बंद करावा आणि प्रादेशिक सशस्त्र गटांना पाठिंबा देणे थांबवावे, अशीही अमेरिकेची मागणी आहे.

पुढील चर्चा कधी?

अब्बास अराघची यांनी 'अल जजीरा' वाहिनीला दिलेल्या मुलाखतीत सांगितले की, "अमेरिकेसोबतच्या पुढील चर्चेची तारीख अद्याप निश्चित झालेली नाही. मात्र, राष्ट्राध्यक्ष ट्रम्प यांनी पुढील आठवड्यात चर्चेचे संकेत दिले आहेत. चर्चा लवकर व्हावी, असे दोन्ही देशांना वाटते, पण अमेरिकेची आक्रमक भूमिका आम्हाला मान्य नाही."

काय आहे तणावाचे मुख्य कारण?

इराण अणू बॉम्ब बनवत असल्याचा अमेरिकेला संशय आहे. ट्रम्प सरकारने इराणच्या अर्थव्यवस्थेची नाकेबंदी करण्यासाठी नवे निर्बंध लादले आहेत. आखाती समुद्रात अमेरिकेने युद्धनौका पाठवल्याने इराण बिथरला आहे. इराणने नेहमीच आपल्या अणू कार्यक्रमाचा उद्देश शांततापूर्ण आणि ऊर्जेसाठी असल्याचे म्हटले आहे. मात्र, ट्रम्प यांच्या पुनरागमनानंतर मॅक्झिमम प्रेशर धोरणामुळे दोन्ही देशांमधील संबंध पुन्हा एकदा टोकाला पोहोचले आहेत.