एपस्टीन फाईल्सचं 'अरब' कनेक्शन! ४६९ ईमेल आणि एका बड्या महिला अधिकाऱ्याचं नाव; काय आहे सत्य?

अमेरिकेच्या न्याय विभागाने सार्वजनिक केलेल्या ताज्या 'एपस्टीन फाईल्स'मध्ये संयुक्त अरब अमिरातीच्या वरिष्ठ राजनैतिक अधिकारी हिंद अल-ओवैस यांचे नाव तब्बल ४६९ वेळा समोर आले आहे.

जगप्रसिद्ध आणि वादग्रस्त जेफ्री एपस्टीन प्रकरणाने पुन्हा एकदा आंतरराष्ट्रीय राजकारणात मोठी खळबळ उडवून दिली आहे. अमेरिकेच्या न्याय विभागाने सार्वजनिक केलेल्या ताज्या 'एपस्टीन फाईल्स'मध्ये संयुक्त अरब अमिरातीच्या वरिष्ठ राजनैतिक अधिकारी हिंद अल-ओवैस यांचे नाव तब्बल ४६९ वेळा समोर आले आहे. या खुलाशामुळे जागतिक स्तरावर उलटसुलट चर्चांना उधाण आले असून, या वरिष्ठ महिला अधिकाऱ्याचा एपस्टीनशी नेमका काय संबंध होता, यावरून तर्कवितर्क लढवले जात आहेत.

कोण आहेत हिंद अल-ओवैस?

हिंद अल-ओवैस या संयुक्त अरब अमिरातीच्या राजनैतिक वर्तुळातील एक अत्यंत वजनदार नाव आहे. सध्या त्या देशाच्या मानवाधिकार स्थायी समितीच्या संचालक म्हणून कार्यरत आहेत. संयुक्त राष्ट्रांमध्ये वरिष्ठ सल्लागार म्हणून काम करणाऱ्या पहिल्या अमिराती महिलांमध्ये त्यांचा समावेश होतो. महिला सक्षमीकरण, लैंगिक समानता आणि मानवाधिकारांच्या विषयावर त्या जागतिक व्यासपीठावर हिरीरीने बोलण्यासाठी ओळखल्या जातात.

ईमेलमधील 'ते' संदेश संशयाच्या भोवऱ्यात?

२०११ आणि २०१२ दरम्यानचे हे ईमेल असल्याचे सांगितले जात आहे. या फाईल्समध्ये केवळ नावच नाही, तर काही संवादही समोर आले आहेत. एका ईमेलमध्ये त्यांनी कथितपणे म्हटले आहे की, "एका मुलीला तयार करणे कठीण असते, दोन मुलींना सांभाळणे हे तर आव्हानच आहे." तसेच दुसऱ्या एका संदेशात त्यांनी आपल्या लहान बहिणीची भेट करून देण्याबाबत उत्सुकता व्यक्त केल्याचेही समोर आले आहे. या संदिग्ध संवादामुळे सोशल मीडियावर अनेक दावे केले जात आहेत, मात्र याला अद्याप अधिकृत दुजोरा मिळालेला नाही.

गुन्हा की केवळ संपर्क?

महत्त्वाची बाब म्हणजे, या फाईल्समध्ये नाव आले असले तरी हिंद अल-ओवैस यांच्यावर कोणताही अधिकृत गुन्हेगारी आरोप ठेवण्यात आलेला नाही. अमेरिकन अधिकाऱ्यांच्या मते, सार्वजनिक करण्यात आलेली कागदपत्रे हा प्राथमिक पुरावा असू शकतो, पण केवळ नाव असणे म्हणजे गुन्हा सिद्ध होणे नव्हे. त्या जेफ्री एपस्टीनच्या बेकायदेशीर कामांमध्ये सामील होत्या की नाही, याचे ठोस पुरावे अद्याप समोर आलेले नाहीत.

युएई सरकार आणि ओवैस यांची चुप्पी

या प्रकरणावर आतापर्यंत हिंद अल-ओवैस किंवा संयुक्त अरब अमिराती सरकारने कोणतीही अधिकृत प्रतिक्रिया दिलेली नाही. आंतरराष्ट्रीय पातळीवर इतकी चर्चा होऊनही त्या आजही आपल्या पदावर कायम आहेत. दुसरीकडे, नागरी हक्क संघटनांनी इशारा दिला आहे की, पूर्ण चौकशी झाल्याशिवाय कोणाच्याही चारित्र्यावर संशय घेणे चुकीचे ठरू शकते.