दुबई हादरलं! विमानतळाजवळ ड्रोन हल्ला, इंधन टाकीचा भीषण स्फोट; आंतरराष्ट्रीय उड्डाणे ठप्प

सोमवारी सकाळी दुबई आंतरराष्ट्रीय विमानतळाच्या परिसरात एका ड्रोनने धडक दिल्याने इंधनाच्या टाकीचा भीषण स्फोट झाला.

दुबई: इराण-इस्रायल युद्धाचा वणवा आता आखाती देशांमधील सर्वात सुरक्षित मानल्या जाणाऱ्या शहरांपर्यंत पोहोचला आहे. सोमवारी सकाळी दुबई आंतरराष्ट्रीय विमानतळाच्या परिसरात एका ड्रोनने धडक दिल्याने इंधनाच्या टाकीचा भीषण स्फोट झाला. या घटनेमुळे संपूर्ण दुबईत खळबळ उडाली असून, खबरदारीचा उपाय म्हणून विमानतळ प्रशासनाने सर्व उड्डाणे तातडीने थांबवली आहेत.

नेमकं काय घडलं?

मिळालेल्या माहितीनुसार, सोमवारी पहाटे दुबईच्या आकाशात एक संशयास्पद ड्रोन घोंघावताना दिसला. काही क्षणांतच हा ड्रोन विमानतळाच्या बाहेरील बाजूस असलेल्या फ्युएल टँकवर जाऊन आदळला. धडक होताच मोठा आवाज होऊन परिसरात आगीचे लोळ उठले. सुदैवाने, दुबई सिव्हिल डिफेन्सच्या पथकाने तातडीने घटनास्थळी धाव घेत आगीवर नियंत्रण मिळवले. सुदैवाने या दुर्घटनेत कोणतीही जीवितहानी झाली नाही, ही एकमेव दिलासादायक बाब आहे.

A drone incident in the vicinity of Dubai International Airport (DXB) affected one of the fuel tanks. Dubai Civil Defence teams are currently working to bring the fire under control. No injuries have been reported so far.

— Dubai Media Office (@DXBMediaOffice) March 16, 2026

विमानतळावर प्रवाशांचा खोळंबा

या हल्ल्यानंतर दुबई सिव्हिल एव्हिएशन अथॉरिटीने सुरक्षेच्या कारणास्तव विमानतळ पूर्णपणे बंद करण्याचा निर्णय घेतला आहे. "प्रवासी आणि कर्मचाऱ्यांची सुरक्षा आमच्यासाठी सर्वोच्च आहे. जोपर्यंत सुरक्षा यंत्रणांकडून ग्रीन सिग्नल मिळत नाही, तोपर्यंत एकही विमान धावपट्टीवरून उडणार नाही," असे प्रशासनाने स्पष्ट केले आहे. प्रवाशांना विमानतळाकडे न येण्याचे आवाहन करण्यात आले असून, आपल्या फ्लाईटचे अपडेट्स ऑनलाईन तपासण्याच्या सूचना देण्यात आल्या आहेत.

पाच दिवसांत दुसरा मोठा हल्ला

धक्कादायक बाब म्हणजे, गेल्या पाच दिवसांतील हा दुबईवरील दुसरा मोठा ड्रोन हल्ला आहे. पाच दिवसांपूर्वीच झालेल्या एका अशाच हल्ल्यात एका भारतीयासह चार जण जखमी झाले होते. गेल्या दोन आठवड्यांपासून सुरू असलेल्या इराण-इस्रायल युद्धामुळे संपूर्ण मध्यपूर्वेत तणावाचे वातावरण आहे. दुबईसारख्या व्यापारी आणि पर्यटन केंद्राला लक्ष्य केले जात असल्याने आता जागतिक स्तरावर चिंतेचे ढग दाटले आहेत.

Dubai Civil Aviation Authority announces the temporary suspension of flights at Dubai International Airport as a precautionary measure to ensure the safety of all passengers and staff. Travellers are advised to contact their respective airlines for the latest updates regarding…

— Dubai Media Office (@DXBMediaOffice) March 16, 2026

भारतीय प्रवाशांची चिंता वाढली

दुबई हे भारतीयांसाठी एक महत्त्वाचे ट्रान्झिट हब आहे. हजारो भारतीय दररोज या विमानतळावरून ये-जा करतात. उड्डाणे रद्द झाल्यामुळे अनेक भारतीय प्रवासी विमानतळावर आणि हॉटेलमध्ये अडकून पडले आहेत. एअर इंडिया आणि इंडिगो सारख्या कंपन्यांकडूनही परिस्थितीवर लक्ष ठेवले जात आहे.