ड्रॅगनची लबाडी! न्यूक्लियर मिसाइलमध्ये इंधनाऐवजी भरलं पाणी; जिनपिंग यांच्या खास जनरलला बेड्या

चीनच्या ताफ्यातील अण्वस्त्रवाहू क्षेपणास्त्रांमध्ये चक्क इंधनाऐवजी पाणी भरल्याचा धक्कादायक प्रकार उघडकीस आला आहे.

आपल्या लष्करी ताकदीचा जगभर गाजावाजा करणाऱ्या चीनच्या पायाखालची जमीन सरकली आहे. चीनच्या ताफ्यातील अण्वस्त्रवाहू क्षेपणास्त्रांमध्ये चक्क इंधनाऐवजी पाणी भरल्याचा धक्कादायक प्रकार उघडकीस आला आहे. अमेरिकेच्या गुप्तचर यंत्रणांनी हा खळबळजनक खुलासा केल्यानंतर, संतापलेल्या राष्ट्राध्यक्ष शी जिनपिंग यांनी चीनच्या रॉकेट फोर्सच्या वरिष्ठ नेतृत्वाला घरचा रस्ता दाखवला आहे. इतकेच नव्हे तर, जिनपिंग यांचे अत्यंत विश्वासू मानले जाणारे टॉप जनरल झांग यूक्सिया यांनाही याप्रकरणी ताब्यात घेण्यात आले आहे.

नेमकं प्रकरण काय? 

अमेरिकन इंटेलिजन्स रिपोर्टनुसार, पश्चिम चीनमधील काही मिसाइल तळांवर तैनात केलेली क्षेपणास्त्रे तातडीने डागण्याच्या स्थितीत नव्हती. जेव्हा या क्षेपणास्त्रांची सखोल तपासणी करण्यात आली, तेव्हा त्यातील इग्निशन सिस्टम निकामी असल्याचे आढळले. धक्कादायक बाब म्हणजे, या मिसाइल्समध्ये हाय-ग्रेड इंधनाच्या जागी पाणी भरण्यात आले होते. लष्करी साहित्यात केलेल्या या मोठ्या भ्रष्टाचाराने चीनच्या सामरिक क्षमतेचे धिंडवडे काढले आहेत.

जिनपिंग यांच्या खास जनरलवर कारवाई 

या भ्रष्टाचारामुळे शी जिनपिंग यांनी आपली 'स्वच्छता मोहीम' सुरू केली आहे. जनरल झांग यूक्सिया, जे सेंट्रल मिलिटरी कमिशनमध्ये जिनपिंग यांच्यानंतरचे सर्वात शक्तिशाली अधिकारी होते, त्यांना तडकाफडकी ताब्यात घेण्यात आले आहे. झांग यांच्यावर केवळ भ्रष्टाचारच नाही, तर अण्वस्त्रांशी संबंधित गुप्त माहिती अमेरिकेला पुरवल्याचा आणि पदाच्या बदल्यात लाच घेतल्याचाही गंभीर आरोप आहे.

रॉकेट फोर्समध्ये मोठी साफसफाई 

चीनची रॉकेट फोर्स ही देशाच्या अण्वस्त्र कार्यक्रमाचा कणा मानली जाते. गेल्या काही महिन्यांत या फोर्समधील संपूर्ण वरिष्ठ नेतृत्व बदलण्यात आले आहे. चीनच्या अधिकृत लष्करी वृत्तपत्रानेही यावर भाष्य करताना म्हटले आहे की, "भ्रष्टाचार हा लष्कराची लढण्याची क्षमता कमकुवत करतो आणि अशा गद्दारांविरुद्ध कठोर कारवाई करणे काळाची गरज आहे."

पाणी की मोठा कट? 

काही तज्ज्ञांच्या मते, क्षेपणास्त्रात पाणी असणे ही तांत्रिक चूक नसून लष्करी बजेट हडपण्यासाठी केलेला मोठा कट असू शकतो. तायवानसोबत वाढत्या तणावाच्या पार्श्वभूमीवर, चिनी लष्कराची ही पोलखोल झाल्याने शी जिनपिंग यांची आंतरराष्ट्रीय पातळीवर मोठी नाचक्की झाली आहे.