शांतता चर्चा फिस्कटल्याने डोनाल्ड ट्रम्प चिडले; आता इराणची खैर नाही, घेराव टाकण्याची दिली धमकी

ट्रम्प यांनी व्हेनेझुएलावर नौदल नाकेबंदी लादली आणि त्याचा फायदा झाला. आता ट्रम्प तीच रणनीती इराणवर वापरू शकतात.

वॉशिंग्टन - अमेरिका आणि इराण यांच्यातील शांतता चर्चा अयशस्वी ठरली आहे. कुठल्याही ठोस तोडग्याशिवाय अमेरिका आणि इराणी शिष्टमंडळ पाकिस्तानातून रवाना झाले. चर्चा निष्फळ ठरल्यानंतर अमेरिकेचे राष्ट्रपती डोनाल्ड ट्रम्प यांनी इराणला धमकी दिली आहे. अमेरिकेने इराणचा सागरी मार्ग रोखल्याचा दावा करण्यात आला आहे. 

डोनाल्ड ट्रम्प यांनी सोशल मिडिया ट्रूथवर एक न्यूज आर्टिकल शेअर केले आहे. त्यात अमेरिका-इराण यांच्यातील चर्चा अयशस्वी ठरल्यास आता ट्रम्प यांच्याकडे इराणी नौदलाला घेराव घालण्याचा पर्याय आहे. ही बातमी चर्चेचा परिणाम समोर येण्यापूर्वीची आहे. त्यात लिहिलंय की, जर इराणने अंतिम प्रस्ताव फेटाळला तर ट्रम्प यांच्याकडे अनेक पर्याय तयार आहेत. ट्रम्प यांनी आधीच इराणला पाताळात पाठवण्याची धमकी दिली आहे. आता ते व्हेनेझुएलासारखे इराणची आर्थिक कोंडी करू शकतात असं सांगण्यात आले आहे.

ट्रम्प यांनी व्हेनेझुएलावर नौदल नाकेबंदी लादली आणि त्याचा फायदा झाला. आता ट्रम्प तीच रणनीती इराणवर वापरू शकतात. त्यातून इराणच्या तेल महसूलाचा मार्ग बंद होईल. चीन आणि भारतासारख्या देशांवर दबाव वाढेल. विशेष म्हणजे व्हेनेझुएलाच्या नाकेबंदीचे नेतृत्व करणारी युद्धनौका यूएसएस जेराल्ड फोर्ड सध्या पर्शियन आखातात तैनात आहे. दुरुस्तीनंतर ती पुन्हा सक्रीय झाली आहे. त्याशिवाय यूएसएस अब्राहम लिंकनही सोबत आहे. अमेरिकन नौदलला आता स्ट्रेट ऑफ होर्मुझवर संपूर्ण नियंत्रण मिळवणे सोपे झाले आहे. मागील २४ तासांत १० जहाजांची वाहतूक पाहायला मिळाली. ज्यात एका रशियन टँकरचा समावेश होता असं लेक्सिंग्टन इन्स्टिट्यूटचे सुरक्षा तज्ज्ञ रेबेका ग्रांट यांनी सांगितले.

दरम्यान, अमेरिका आणि इराण यांच्यातील युद्ध पुन्हा सुरू झाले तर अमेरिकन सैन्य इराणच्या खार्ग बेटावर कब्जा करू शकते किंवा ते उद्ध्वस्त करू शकते. खार्ग बेट इराणची आर्थिक नाडी आहे. जर खार्ग बेटावर अमेरिकेने कब्जा केला तर तिथल्या तेल आणि इतर गोष्टींवर अमेरिकेची पकड होईल. त्यातून इराणवर दबाव वाढेल आणि त्यांचा समृद्ध यूरेनियमचा साठा जप्त करता येऊ शकतो असं सेवानिवृत्त जनरल जैक किन यांनी म्हटलं आहे.