सर्वात मोठा राजकीय धक्का! एपस्टीन प्रकरणाची धग ब्रिटनपर्यंत पोहचली, पंतप्रधानांचे पद धोक्यात

मुख्य सल्लागाराचा तडकाफडकी राजीनामा, हे संपूर्ण प्रकरण पीटर मँडेलसन यांच्या नियुक्तीभोवती फिरत आहे

लंडन - बदनाम सेक्स रॅकेटचा सूत्रधार जेफ्री एपस्टीन प्रकरणाचे पडसाद आता ब्रिटनच्या सत्तेच्या केंद्रस्थानी उमटले असून पंतप्रधान कीर स्टार्मर यांचे पद धोक्यात आले आहे. स्टार्मर यांचे सर्वांत विश्वासू आणि मुख्य सल्लागार मॉर्गन मॅकस्विनी यांनी या वादाच्या पार्श्वभूमीवर आपल्या पदाचा राजीनामा दिला आहे. 

जुलै २०२४ मध्ये लेबर पार्टीला ऐतिहासिक विजय मिळवून देण्यात मॅकस्विनी यांचा मोठा वाटा होता. त्यामुळे त्यांचा राजीनामा हा स्टार्मर यांच्यासाठी मोठा वैयक्तिक आणि राजकीय धक्का मानला जात आहे.

वादाचे मूळ : पीटर मँडेलसन यांची नियुक्ती
हे संपूर्ण प्रकरण पीटर मँडेलसन यांच्या नियुक्तीभोवती फिरत आहे. मॅकस्विनी यांच्या सल्ल्यानुसार मँडेलसन यांची अमेरिकेतील ब्रिटनचे राजदूत म्हणून नियुक्ती झाली होती.  मात्र, अमेरिकेत प्रसिद्ध झालेल्या एपस्टीनच्या फाइल्समधून मँडेलसन मँडेलसन यांनी गोपनीय सरकारी माहिती एपस्टीनला पुरवल्याचाही आरोप आहे. नॉर्वेच्या वरिष्ठ राजनैतिक अधिकारी व जॉर्डनमधील नॉर्वेच्या राजदूत मोना जूल यांनी रविवारी आपल्या पदाचा राजीनामा दिला. जेफ्री एपस्टीनसोबत असलेल्या संबंधांच्या चौकशीनंतर त्यांनी हा निर्णय घेतला.