अमेरिकेत मोठी घटना! दोन खासदारांवर घरात घुसून गोळीबार; महिला खासदार, पतीचा मृत्यू

America MP Firing: दोन्ही घटना वेगवेगळ्या ठिकाणी घडल्या आहेत. मिनियापोलिसच्या उपनगरातील चॅम्पलिन आणि ब्रुकलिन पार्क येथील दोन्ही खासदारांच्या घरांमध्ये गोळीबार करण्यात आला आहे.

अमेरिकेमध्ये गोळीबाराची मोठी घटना घडली आहे. मिनेसोटा येथील दोन खासदारांवर पोलिसांच्या वेशात आलेल्या हल्लेखोरांनी गोळीबार केला. यामध्ये महिला खासदाराचा मृत्यू झाला असून दुसरे खासदार गंभीर जखमी झाले आहेत. 

स्टेट सीनेटर जॉन हॉफमैन आणि स्टेट रिप्रजेंटेटिव मेलिसा हॉर्टमन यांच्या निवासस्थानामध्ये घुसून हा हल्ला करण्यात आला आहे. यामध्ये मेलिसा हॉर्टमन व त्यांच्या पतीचा मृत्यू झाला आहे. जॉन हॉफमन या हल्ल्यात जखमी झाले आहेत. हे दोघेही डोमोक्रेटीक पक्षाचे होते. 

दोन्ही घटना वेगवेगळ्या ठिकाणी घडल्या आहेत. मिनियापोलिसच्या उपनगरातील चॅम्पलिन आणि ब्रुकलिन पार्क येथील दोन्ही खासदारांच्या घरांमध्ये गोळीबार करण्यात आला आहे. हल्लेखोर पोलिस अधिकारी असल्याचे सांगत घरात घुसले होते. पोलिसांनी चौकशी सुरु केली असून हल्लेखोर मोटरसायकलवरून आल्याचे सांगितले जात आहे. 

हल्लेखोर पोलिसांच्या वेशात होते. यामुळे पोलिसांनी या दोन्ही भागातील नागरिकांना घराबाहेर न पडण्याचे आवाहन केले आहे. पोलीस या हल्लेखोरांचा शोध घेत असून एक संदिग्ध वाहन सापडल्याचे पोलिसांनी सांगितले आहे. या वाहनामध्ये काही पोस्टर सापडले असून त्यावर अनेक खासदारांची नावे लिहिली आहेत. हा एक टार्गेटेड हल्ला होता, हे यावरून स्पष्ट होत असल्याचे पोलिसांनी सांगितले.