युद्धाच्या आगीत अमेरिका होरपळली! राष्ट्राध्यक्ष डोनाल्ड ट्रम्प यांचा ऐतिहासिक चीन दौरा रद्द

इराण, इस्रायल आणि अमेरिका यांच्यात सुरू असलेल्या युद्धाचे पडसाद आता थेट अमेरिकेच्या राजनैतिक निर्णयांवर पडू लागले आहेत.

इराण, इस्रायल आणि अमेरिका यांच्यात सुरू असलेल्या भीषण युद्धामुळे जागतिक राजकारण पूर्णपणे ढवळून निघाले आहे. या युद्धाचे पडसाद आता थेट अमेरिकेच्या राजनैतिक निर्णयांवर पडू लागले आहेत. परिस्थितीचे गांभीर्य ओळखून अमेरिकेचे राष्ट्राध्यक्ष डोनाल्ड ट्रम्प यांनी आपला अत्यंत महत्त्वाचा आणि ऐतिहासिक मानला जाणारा चीन दौरा तडकाफडकी लांबणीवर टाकला आहे. "युद्ध सुरू असताना माझं वॉशिंग्टनमध्ये असणं जास्त गरजेचं आहे," असं स्पष्ट करत ट्रम्प यांनी सध्या आपला पूर्ण फोकस युद्धावरच असल्याचं जाहीर केलं आहे.

नेमका काय होता कार्यक्रम?

डोनाल्ड ट्रम्प ३१ मार्च ते २ एप्रिल या काळात चीनच्या दौऱ्यावर जाणार होते. या दौऱ्यात त्यांची चीनचे राष्ट्राध्यक्ष शी जिनपिंग यांच्याशी भेट होणार होती. व्यापार आणि जागतिक सुरक्षेच्या दृष्टीने ही भेट अत्यंत कळीची मानली जात होती. मात्र, इराणसोबत सुरू असलेल्या संघर्षाने रौद्र रूप धारण केल्यामुळे ट्रम्प यांनी सध्या परदेश दौरा न करण्याचा मोठा निर्णय घेतला आहे.

दौरा रद्द करण्यामागचं खरं कारण काय?

ट्रम्प यांनी स्वतः या निर्णयाचा खुलासा केला आहे. ते म्हणाले, "सध्या इराणसोबत आमचं युद्ध सुरू आहे. अशा परिस्थितीत देश सोडून जाणं योग्य ठरणार नाही. हा निर्णय अत्यंत साधा आणि स्पष्ट आहे; माझ्या देशात युद्धजन्य परिस्थिती असताना माझं इथे उपस्थित राहणं अनिवार्य आहे." मात्र, हे युद्ध लवकरच संपेल आणि त्यानंतर जग अधिक सुरक्षित होईल, असा दावाही त्यांनी यावेळी केला.

तेल पुरवठ्यावर टांगती तलवार!

दुसरीकडे, इराणने दिलेल्या एका धमकीने जगाची चिंता वाढवली आहे. जर अमेरिकेने हल्ले थांबवले नाहीत, तर 'होर्मुजची सामुद्रधुनी'वरून होणारी जहाजांची वाहतूक रोखू, असा इशारा इराणने दिला आहे. जगातील एकूण २० टक्के तेल पुरवठा याच मार्गाने होतो. हा मार्ग बंद झाल्यास जागतिक स्तरावर इंधन टंचाई आणि महागाईचा भडका उडू शकतो. याच धोक्यामुळे ट्रम्प सध्या अमेरिकेत राहून या संकटाचा सामना करत आहेत.

चीनची भूमिका गुलदस्त्यात?

ट्रम्प यांनी चीनसह अनेक देशांना आवाहन केलं आहे की, त्यांनी या सागरी मार्गावरून होणारी वाहतूक सुरक्षित ठेवण्यासाठी सहकार्य करावं. मात्र, चीनकडून अद्याप कोणतीही ठोस प्रतिक्रिया आलेली नाही. दरम्यान, ट्रम्प आणि शी जिनपिंग यांच्यातील भेट जरी टळली असली, तरी दोन्ही देशांचे अधिकारी व्यापार आणि इतर मुद्द्यांवर पडद्यामागून चर्चा करत आहेत, जेणेकरून भविष्यात ही भेट यशस्वी होईल.