लोकमत न्यूज नेटवर्क
हिंगोली : कोरोनाबाधितांची संख्या पाहता, कॉन्टॅक्ट ट्रेसिंग तसे कमीच होत आहे. आजघडीला शासनाच्या नियमाप्रमाणे हिंगोली जिल्ह्याची ट्रेसिंग ही एका कोरोनाबाधितामागे २३ अशीच आहे. खरे पाहिले तर ही संख्या ३०वर न्यायला हवी. परंतु, तसे होताना आजतरी दिसत नाही.
फेब्रुवारीच्या दुसऱ्या आठवड्यापासून कोरोना रुग्णांची संख्या दिवसेंदिवस वाढत आहे. दोन अंकी संख्या कोरोनाने केव्हाच पार केली आहे. मागील दोन आठवड्यांपासून तर रुग्णसंख्येत मोठ्या प्रमाणात वाढ होत आहे. जिल्हा प्रशासनाने कोरोनाबाधितांची होत असलेली वाढ पाहून बसस्थानक, रेल्वे स्थानक आदी ठिकाणी अँटिजेन, आरटीपीसीआर तपासणी करण्याची व्यवस्था केली आहे. परंतु, याठिकाणी अँटिजेन तपासणीवेळी कोरोना पॉझिटिव्ह निघाल्यानंतर तो इतरांना बोलतो. एवढेच काय हातमिळवणी सुद्धा करतो, हे अनेकांनी पाहिले आहे.
पॉझिटिव्ह रुग्ण निघाल्यानंतर पंधरा-वीस मिनिटात कोरोना सेंटरवरून गाडी यायला हवी. परंतु, संबंधितांनी सांगूनही कोरोना सेंटरवरील गाडी वेळेवर येत नाही. त्यामुळे हा कोरोनाबाधित रुग्ण इतरांशी गप्पा मारत बसतो. मध्यंतरी बसस्थानकात कोरोना पॉझिटिव्ह निघालेल्या दोन महिला पळून जाण्याचा प्रयत्न करत होत्या. पोलिसांच्या मदतीने या दोन महिलांना पकडून आणून कोरोना सेंटरवर दाखल केले आहे.
२३ मार्च २०२०पासून कोरोनाने सर्वत्र शिरकाव केला. तेव्हापासून बाधितांचा ट्रेस करण्याची संख्या २३ आहे. खरं पाहिलं तर एका कोरोनाबाधितांच्या मागे ३५ संख्या असायला हवी. विशेष म्हणजे यात सातत्य ठेवायला पाहिजे. कोरोनाबाधित रुग्ण निघाल्यास त्याला पायबंद करून एकाच जागी बसविण्यात आल्यास इतरांना त्याची इजा पोहोचणार नाही आणि कोरोनाला आळा बसेल. कोरोना रुग्ण वाढल्याचे पाहून जिल्हा प्रशासनाने दिनांक १ मार्च ते ७ मार्च आणि २९ मार्च ते ४ एप्रिल या दरम्यान दोनवेळा टाळेबंदी केली. परंतु, अजूनही काही कोरोनाबाधित रुग्ण हे मोकाटपणे फिरताना दिसून येत आहेत.