‘पिण्याच्या पाण्याची व्यवस्था करावी’
हिंगोली : येथील बसस्थानकात मागील काही महिन्यांपासून प्रवाशांसाठी पिण्याच्या पाण्याची व्यवस्था करण्यात आली नाही. प्रवाशांना पाणी बाजूच्या हॉटेलमधून विकत आणावे लागत आहे. पिण्याचे पाणी बसस्थानकात उपलब्ध करून द्यावे, अशी मागणी आगार प्रमुखांकडे करण्यात आली; परंतु अजून तरी पाण्याची सोय उपलब्ध करून दिली नाही. उन्हाची तीव्रता लक्षात घेऊन प्रवाशांसाठी पाणी उपलब्ध करून द्यावे, अशी मागणी प्रवाशांनी केली आहे.
खंडित वीजपुरवठ्यामुळे शेतकरी त्रस्त
कळमनुरी : तालुक्यातील ग्रामीण भागात वीज खंडित होण्याचे प्रमाण वाढत आहे. शेतात पाणी असूनही वीजपुरवठा खंडित होत असल्यामुळे पिकांना देता येत नाही. परिणामी पिके वाळून जात आहेत. महावितरण कंपनीने याची दखल घेऊन ग्रामीण भागातील वीजपुरवठा सुरळीत करावा, अशी मागणी शेतकऱ्यांनी केली आहे.
कळमनुरी शहरात अनियमित पाणीपुरवठा
कळमनुरी : शहरातील रेणुकानगर, गणेशनगर, भोई गल्ली, ब्राह्मणगल्ली, सहयोगनगर आदी नगरांमध्ये पंधरा-वीस दिवसांपासून पाणीपुरवठा अनियमित होत आहे, तसेच पाणी कमी प्रमाणात येत आहे. वेळेवर पाणी सोडण्याबाबत नगर परिषदेच्या संंबंधित विभागाला सांगण्यात आले; परंतु अद्यापतरी लक्ष दिले नाही. उन्हाची तीव्रता लक्षात घेऊन शहरात पाणीपुरवठा वेळेवर करावा, अशी मागणी नागरिकांनी केली आहे.
बसस्थानकात कचऱ्याचे ढीग
कळमनुरी : येथील बसस्थानकात मागील काही दिवसांपासून कचऱ्याचे ढीग साचलेले पाहायला मिळत आहेत. जागोजागी साचलेला कचरा उडून प्रवाशांच्या अंगावर येत आहे. कचऱ्यामुळे डासांचे प्रमाणही वाढले आहे. प्रवाशांची मागणी लक्षात घेऊन आगार प्रमुखांनी बसस्थानकात स्वच्छता मोहीम राबविणे गरजेचे आहे.
नव्याने गतिरोधक टाकण्याची मागणी
हिंगोली : शहरातील खटकाळी भागातील गतिरोधक
थोडे उंच झाले आहे. काही दुचाकीचालक गतिरोधकाच्या बाजूने ये-जा करीत आहेत. त्यामुळे पादचाऱ्यांना दुचाकी अंगावर येण्याची भीती वाटत आहे. संबंधित विभागाने याची दखल घेऊन गतिरोधक नव्याने टाकावे, अशी मागणी या भागातील नागरिकांनी केली आहे.
अस्ताव्यस्त वाहनामुळे वाहतुकीचा खोळंबा
हिंगोली : शहरातील कापड गल्ली भागात वाहने अस्ताव्यस्त उभी केली जात आहेत. त्यामुळे वाहतुकीचा खोळंबा होत आहे. वाहने उभी करण्यावरून बहुतांश वेळा वादही निर्माणही होत आहेत. शहर वाहतूक शाखेने याची दखल घेऊन वाहतूक व्यवस्था सुरळीत करावी, अशी मागणी या भागातील व्यापाऱ्यांनी केली आहे.