बैल परवडत नाही म्हणून भाऊ आणि भाच्यानी खांद्यावर घेतले ‘जू’, पैसे आणायचे कुठून?  

हिंगोली जिल्ह्यातील अल्पभूधारक शेतकऱ्याची व्यथा, पैसे आणायचे कुठून? बैलजोडीला मोजावे लागतात ६० ते ८० हजार रुपये

लोकमत न्यूज नेटवर्क, वसमत (जि. हिंगोली) : अल्पभूधारक शेतकऱ्यांना बैलजोडी परवडत नाही. बैलजोड्या महाग झाल्याने अल्पभूधारक शेतकरी उत्पन्न काढणार काय अन् लागवड करणार काय? हा प्रश्न शेतकऱ्यांसमोर असतो. अशात शेती मशागत व पेरणीसाठी बैलजोडी मिळाली नसल्याने शेतकरी बालाजी पुंडगे यांनी चक्क सख्खा भाऊ व साडूच्या मुलास औताला जुंपून हळदीच्या शेतात सरी मारली. शेत मुख्य रस्त्यावर असल्याने हा प्रकार अनेकांच्या समोर आला.

अर्धा एकरातील सरी दोघांनी पूर्ण केली
- बालाजी पुंडगे यांना दोन एकर शेतजमीन असून अर्धा एकरावर हळद आहे. भाऊ व इतर परिवार रोज मजुरी व शेतीची कामे करून कुटुंबाचा गाडा हाकतात. सोमवारी त्यांनी आपल्या शेतात हळदीसाठी सरी (दौसा) मारण्यास सुरुवात केली.
- सरीसाठी बैल आणायचे कोणाचे आणि कोठून? हा प्रश्न त्यांना पडला होता. त्यामुळे लहान भाऊ मनोहर पुंडगे व त्यांच्या साडूच्या मुलास औताला जुंपले. दोघांच्या खांद्यावर औताचे जू देऊन सरी पूर्ण केली. 

बैलजोडी कशी परवडणार? 

• बालाजी पुंडगे यांचे शेत वाई ते बोल्डा मार्गावर आहे. सरी मारताना बैलाऐवजी माणसाद्वारे औत हाकले जात असल्याचे पाहून अनेकांनी त्या ठिकाणी थांबून हा प्रकार पाहिला. 
• यावेळी प्रत्येकाजवळ भावुक होत त्यांनी आपल्या अडीअडचणी मांडल्या. रोज मजुरी करणारे कुटुंब आम्हाला बैलजोडी कशी परवडणार? बैलजोडी घ्यायची म्हटल्यावर ६० ते ८० हजार मोजावे लागतात, असेही त्यांनी सांगितले.