हिंगोलीत विहिरीत आढळला महिलेचा संशयास्पद अवस्थेत मृतदेह

खटकाळी भागातील विहीरीवर सोमवारी सकाळी चिखलवाडी भागातील काही नागरीक पाणी भरण्यासाठी गेले होते. त्यावेळी पाण्यावर मृतदेह तरंगत असल्याचे दिसून आले.

हिंगोली : शहराजवळ असलेल्या खटकाळी भागातील एका विहीरीमध्ये सोमवारी ( दि. १५ ) सकाळी सात वाजण्याच्या सुमारास एका २५ वर्षीय महिलेचा मृतदेह आढळून आला. ऐश्‍वर्या महेश श्रीरामे असे मृत महिलेचे नाव आहे. मृत महिलेच्या हातावर कापल्याच्या जखमा आढळून आल्याचे बोलले जात आहे. पोलिसांनी तपास सुरु केला असून तपासानंतरच आत्महत्या आहे की, खून हे स्पष्ट होणार आहे.

खटकाळी भागातील विहीरीवर सोमवारी सकाळी चिखलवाडी भागातील काही नागरीक पाणी भरण्यासाठी गेले होते. त्यावेळी पाण्यावर मृतदेह तरंगत असल्याचे दिसून आले. या घटनेची माहिती हिंगोली ग्रामीण पोलिसांना मिळताच पोलिस अधीक्षक राकेश कलासागर यांच्या मार्गदर्शनाखाली अतिरिक्त पोलिस अधीक्षक यतीश देशमुख, हिंगोली ग्रामीण पोलिस ठाण्याचे सहाय्यक पोलिस निरीक्षक बळीराम बंदखडके, जमादार रविकांत हरकाळ, अशोक धामणे, गजानन पोकळे यांच्या पथकाने घटनास्थळी भेट दिली. त्यानंतर नागरीकांच्या मदतीने पोलिसांनी मृतदेह विहीरीच्या बाहेर काढला. 

मृत महिला महसुल कॉलनी भागात राहणाऱ्या ऐश्‍वर्या महेश श्रीरामे यांचा असल्याचे पोलिसांनी सांगितले. ज्या विहीरीत मृतदेह आढळला त्या विहीरीवर रक्ताचे डाग असून विहीरीपासून काही अंतरावरही रक्त सांडलेले आढळून आले आहे. त्यामुळे ही घटना आत्महत्या का खून याचा तपास पोलिसांनी सुरु केला आहे. याप्रकरणी हिंगोली ग्रामीण पोलीस ठाण्यात नोंद झाली नव्हती.