एसआरपीएफ जवानाचा मृतदेह संशयास्पद स्थितीत आढळला

मृतदेह राजकुमार उत्तमराव पवार (४२) यांचा असून ते हिंगोली राज्य राखीव दलात कार्यरत होते. ते मंगळवारी जांभळी तांडा येथील आपल्या नातलगाकडे गेले होते. रात्री सात वाजता त्यांनी तिथे जेवण केले व जांभरुन तांडा येथील मावशीला भेटून हिंगोलीकडे एमएच २६-व्ही ३४७१ या कारने हिंगोलीत येत होते. लोहगावजवळील भोसी-हिंगोली रोडवर असलेल्या विहिरीत त्यांचा मृतदेह आढळून आला. त्यांच्या डोक्यास मार लागलेला असून घातपाताचा संशय व्यक्त केला जात आहे. ते व्होलगिरा ता. सेनगाव येथील रहिवासी असून ते विवाहित होते. त्यांच्या मागे पत्नी, दोन मुली, आई, दोन भाऊ असा परिवार आहे. घटनास्थळी हिंगोली ग्रामीण पोलीस पथक व श्वान पथक आले होते. या घटनेचा पंचनामा करून मृतदेह हिंगोली जिल्हा रुग्णालयात शवविच्छेदनासाठी पाठविण्यात आला आहे. या घटनेची हिंगोली ग्रामीण पोलीस ठाण्यात गुन्हा दाखल करण्यात आला आहे. घटनास्थळी यशवंत काळे, यतीश देशमुख, खंडेराय, पोटे, बी.एच. कांबळे यांची उपस्थिती होती.