हिंगाेली : येथील जिल्हा परिषदेचे अध्यक्ष गणाजी बेले यांच्या शासकीय वाहनाला जीवे मारण्याच्या उद्देशाने टिप्परने जोराची धडक दिली. यावेळी बेले यांना लोखंडी टॉमीने मारहाण केल्याप्रकरणी एका नगरसेवकासह तिघांविरूद्ध शहर पोलीस ठाण्यात गुन्हा दाखल झाला आहे.
येथील जिल्हा परिषदेचे अध्यक्ष गणाजी बेले हे ९ एप्रिल रोजी दुपारी दीड वाजण्याच्या सुमारास (एमएच ३८ जी १००९) या शासकीय वाहनाने गावाकडून शासकीय निवासस्थानाकडे येत होते. त्यांचे वाहन हिंगोली शहरातील रेल्वे उड्डाणपुलाजवळ आले असता, शासकीय निवासस्थानाकडे वळत होते. यावेळी आपले वाहन पकडण्याच्या उद्देशानेच समोरील शासकीय वाहन थांबले असल्याच्या भीतीने (एमएच १२ एचडी ३१५६)च्या टिप्पर चालकाने जीवे मारण्याच्या उद्देशाने गणाजी बेले यांच्या शासकीय वाहनाला जोराची धडक दिली. त्यानंतर तिघांनी गणाजी बेले यांना लोखंडी टॉमीने मारहाण करत शिवीगाळ करून जीवे मारण्याची धमकी दिली. त्यांच्या शासकीय वाहनातील सहकाऱ्यांनाही मारहाण झाल्याचे फिर्यादीत म्हटले आहे. याप्रकरणी जिल्हा परिषद अध्यक्ष गणाजी बेले (रा. खेर्डावाडी) यांच्या फिर्यादीवरून नगरसेवक आरेफ शे., अजीज शे. शादीक, शे. शाबाद (सर्व रा. हिंगोली) यांच्याविरूद्ध हिंगोली शहर पोलीस ठाण्यात गुन्हा दाखल झाला आहे. याबाबतचा अधिक तपास सहाय्यक पोलीस निरीक्षक शहारे करत आहेत. दरम्यान, घटनास्थळी उपविभागीय पोलीस अधिकारी यतीश देशमुख, पोलीस निरीक्षक पंडित कच्छवे, सहाय्यक पोलीस निरीक्षक शहारे, पोलीस उपनिरीक्षक केणेकर यांनी घटनास्थळी भेट देत पाहणी केली.