हिंगोली : वीजबील भरण्यासाठी छापील वीजबिलाऐवजी ई-मेल व एसएमएसचा पर्याय स्वीकारणाऱ्या ग्राहकांना प्रती वीजबील १० रुपये सवलत महावितरणने १ डिसेंबर २०१८ ला जाहीर केली होती. मागील एका महिन्यात राज्यातील २१ हजार ग्राहकांनी तर नांदेड परिमंडळातील ९९५ वीजग्राहकांनी या सवलतीचा लाभ घेतला आहे. अन्य ग्राहकांनीही या सवलतीचा लाभ घेण्याचे आवाहन महावितरणने केले आहे.
पर्यावरणपूरक कागदविरहीत वीजबीलासाठी आता घरगुती, व्यावसायिक अशा लघूदाब वीजग्राहकांनीही गो-ग्रीनच्या माध्यमातून सवलीचा लाभ घेण्याचे आवाहन केले जात आहे. नांदेड परिमंडळातील नांदेड, हिंगोली व परभणी जिल्हयातील वीजग्राहकांनी कागदविरहीत वीजबिलांसाठी केलेली नोंदणी अत्यल्प आहे. नांदेड जिल्हयात ५५९ परभणीमध्ये २६५ तर हिंगोली जिल्हयामध्ये केवळ १७१ वीजग्राहकांनी नोंदणी केली आहे. वीजबील आॅनलाईन पाहण्यासाठी महावितरणने ग्राहकांना मोबाईल अ‍ॅप व http://www.mahadiscom.in या संकेतस्थळावर विविध पर्याय उपलब्ध करून दिले आहेत.
या सर्व सुविधा उपलब्ध असतानाही महावितरणतर्फे ग्राहकांना छापील वीजबीलही उपलब्ध करून देण्यात येते. परंतू जे ग्राहक गो-ग्रीन सुविधेचा पर्याय निवडतात, अशा ग्राहकांना छापील बिलाऐवजी ईमेल व एसएमएसद्वारे वीजबील उपलब्ध करून दिले जाते. अशा सर्व ग्राहकांना १ डिसेंबर २०१८ पासून प्रतीबील १० रुपये सवलत दिली जात आहे. गो-ग्रीनचा पर्याय निवडण्यासाठी ग्राहकांनी वीजबिलावरील गो-ग्रीन क्रमांकाची नोंदणी महावितरणच्या मोबाईल अ‍ॅपद्वारे अथवा महावितरणच्या संकेतस्थळावर करावी. गो-ग्रीनचा पर्याय निवडणाऱ्या ग्राहकांना तातडीने वीजबील मिळणार असून संदभार्साठी वीजबिलाचे जतन करणेही सोपे ठरणार आहे. गो-ग्रीनचा पर्याय पर्यावरण संवर्धनालाही हातभार लावणारा आहे. त्यामुळे जास्तीत जास्त वीजग्राहकांनी कागद विरहीत गो-ग्रीन सुविधेचा लाभ घ्यावा, असे आवाहन महावितरणचे अध्यक्ष व व्यवस्थापकीय संचालक संजीव कुमार यांनी केले आहे.