Corona Virus : भय इथले संपत नाही! कोरोनाच्या नव्या 'सुपर व्हेरिएंट'ने वाढवलं टेन्शन; शास्त्रज्ञांचा मोठा खुलासा

Corona Virus : अमेरिकेत सध्या कोरोनाचा एक नवीन व्हेरिएंट वेगाने पसरत आहे, ज्याला BA.3.2 असं नाव देण्यात आलं आहे.

अमेरिकेत सध्या कोरोनाचा एक नवीन व्हेरिएंट वेगाने पसरत आहे, ज्याला BA.3.2 असं नाव देण्यात आलं आहे. शास्त्रज्ञांच्या मते हा व्हेरिएंट सध्याच्या लसींपासून मिळणाऱ्या संरक्षणाला काही प्रमाणात कमकुवत करू शकतो. यामुळेच चिंता वाढत आहे, मात्र अद्याप त्याचे गंभीर परिणाम पूर्णपणे समोर आलेले नाहीत.

हा नवीन व्हेरिएंट ओमायक्रॉनचाच एक प्रकार असून, तो सर्वात आधी २०२४ मध्ये दक्षिण आफ्रिकेत आढळला होता. त्यानंतर २०२५ मध्ये अमेरिकेतही त्याची ओळख पटली. हळूहळू हा व्हेरिएंट अनेक देशांत पसरला असून आतापर्यंत २० पेक्षा जास्त राज्यांमध्ये याचे संकेत मिळाले आहेत. विशेष म्हणजे, हा केवळ रुग्णांमध्येच नाही, तर विमानतळांवरील सांडपाण्याच्या नमुन्यांमध्येही आढळला आहे. यावरून असा अंदाज लावला जात आहे की, याचा प्रसार दिसतो त्यापेक्षा कितीतरी जास्त असू शकतो.

नवा व्हायरस नेमका कसा आहे?

शास्त्रज्ञांच्या मते, BA.3.2 च्या स्पाइक प्रोटीनमध्ये सुमारे ७० ते ७५ म्यूटेशन्स आढळले आहेत. हेच स्पाइक प्रोटीन व्हायरसला मानवी पेशींमध्ये प्रवेश करण्यास मदत करतं. या बदलांमुळे हा व्हेरिएंट अधिक वेगाने पसरू शकतो आणि शरीराच्या रोगप्रतिकारशक्तीला चकवा देऊ शकतो. 'इंडिपेंडंट'च्या वृत्तानुसार, प्रयोगशाळेतील चाचण्यांमध्ये असं दिसून आलं आहे की, सध्याच्या कोरोना लसी (ज्या JN.1 सारख्या व्हेरिएंटसाठी बनवल्या आहेत) BA.3.2 विरुद्ध तितक्या प्रभावी ठरू शकत नाहीत. म्हणूनच शास्त्रज्ञ भविष्यात लस अपडेट करण्याच्या गरजेवर भर देत आहेत.

नवीन कोरोना किती धोकादायक?

दिलासादायक बाब ही आहे की, अद्याप या व्हेरिएंटच्या रुग्णांमध्ये फारशी गंभीरता दिसून आलेली नाही. काही रुग्ण रुग्णालयात दाखल झाले असले तरी ते सर्व पूर्णपणे बरे झाले आहेत. तज्ज्ञांचे म्हणणं आहे की, केवळ रुग्णालयात रुग्ण आढळले म्हणजे हा व्हेरिएंट अधिक धोकादायक आहे, असं सिद्ध होत नाही. तरीही सावध राहण्याचा सल्ला देण्यात येत आहे.

कोरोना आता 'एंडेमिक' (स्थानिक आजार) बनला आहे, म्हणजेच तो पूर्णपणे संपलेला नाही आणि वेळोवेळी त्याचे नवीन व्हेरिएंट येतच राहतील. जेव्हा जेव्हा व्हायरसमध्ये बदल होतो, तेव्हा त्याची पसरण्याची किंवा प्रतिकारशक्तीला चकवण्याची क्षमता बदलू शकते. आरोग्य तज्ज्ञांच्या मते, संसर्ग रोखणं हाच सर्वात महत्त्वाचा उपाय आहे. व्हायरसला पसरण्याची संधी जितकी कमी मिळेल, तितकं त्याचं नवीन रूप बदलण्याचं प्रमाण कमी होईल. याच दरम्यान फ्लू आणि RSV सारखे श्वसनाचे आजारही वाढत आहेत, पण कोरोनाचा धोका अजूनही टळलेला नाही.