कर्नाटकमध्ये 'क्यासानूर फॉरेस्ट डिसीज' (KFD) म्हणजेच मंकी फीवरमुळे एका २९ वर्षीय तरुणाचा मृत्यू झाला आहे. या घटनेमुळे आरोग्य यंत्रणा सतर्क झाली असून या आजाराबाबत पुन्हा एकदा चिंता व्यक्त केली जात आहे. तिरथहल्ली तालुक्यातील रहिवासी असलेल्या या तरुणाचा २८ जानेवारी रोजी उडुपी येथील रुग्णालयात उपचारादरम्यान मृत्यू झाला.
आरोग्य विभागाचे आयुक्त गुरुदत्ता हेगडे यांनी माहिती दिली की, ही घटना अत्यंत दुर्दैवी आहे. साधारणपणे जर संसर्ग झाल्यापासून एका आठवड्याच्या आत या आजाराचं निदान झालं, तर रुग्ण वाचण्याची शक्यता जवळपास १०० टक्के असते. या तरुणाला लक्षणं दिसताच रुग्णालयात दाखल करण्यात आलं होतं आणि एका दिवसात निदानाची पुष्टीही झाली होती. काही दिवसांपूर्वीपर्यंत त्याची प्रकृती स्थिर होती, मात्र अचानक तब्येत खालावल्याने त्याचा मृत्यू झाला.
मंकी फीवर कसा पसरतो?
डॉक्टरांनी दिलेल्या माहितीनुसार, नावात 'मंकी' असलं तरी हा आजार थेट माकडांपासून माणसांना होत नाही. हा आजार मुख्यत्वे 'हेमाफिसॅलिस स्पिनिगेरा' नावाच्या एका विशिष्ट जंगली गोचीडामुळे पसरतो. खार आणि उंदीर यांसारखे प्राणी देखील या संसर्गाचे सोर्स असू शकतात. जेव्हा एखादा बाधित गोचीड चावतो किंवा एखादी व्यक्ती संसर्ग झालेल्या मृत माकडाच्या संपर्कात येते, तेव्हा हा आजार होतो. हा आजार एका माणसाकडून दुसऱ्या माणसाकडे पसरत नाही. साधारणपणे ऑक्टोबर-नोव्हेंबरमध्ये याची सुरुवात होते आणि जानेवारी ते एप्रिल दरम्यान याचे प्रमाण सर्वाधिक असतं.
धोका का वाढतो?
जंगलात जाणे, प्राण्यांची हाताळणी करताना सुरक्षिततेची काळजी न घेणे किंवा ज्या भागात बाधित माकडांचा मृत्यू झाला आहे तिथे वावरणं, यामुळे संसर्गाचा धोका वाढतो.
प्रमुख लक्षणं
मंकी फीवरची लक्षणे साधारणपणे ३ ते ८ दिवसांत दिसून येतात:
थंडी वाजणं आणि खूप डोकेदुखी
नाक, घसा आणि हिरड्यांमधून रक्तस्त्राव होणं.
लो ब्लड प्रेशर
प्लेटलेट्स आणि रक्तातील पेशींची संख्या कमी होणं
गंभीर प्रकरणांमध्ये काही मज्जासंस्थेशी संबंधित लक्षणंही दिसू शकतात:
उलट्या आणि मळमळ
स्नायूंमध्ये कडकपणा
मानसिक गोंधळ किंवा भ्रम
दृष्टी कमकुवत होणं
मृत्यूदर आणि उपचार
मंकी फीवरचा मृत्यूदर साधारणपणे २ ते १० टक्के इतका आहे. वेळेवर उपचार मिळाल्यास रुग्ण पूर्णपणे बरा होऊ शकतो. सध्या यावर कोणतेही विशिष्ट औषध नाही, त्यामुळे लक्षणांनुसार उपचार केले जातात:. रुग्णाला IV Fluids (सलाईन) दिले जातात. रक्तस्त्राव थांबवण्यासाठी प्रयत्न केले जातात. पुरेसा आराम, प्रोटीनयुक्त आहार आणि भरपूर पाणी पिण्याचा सल्ला दिला जातो.
Web Summary : A 29-year-old died in Karnataka due to Monkey Fever (KFD). Transmitted by infected ticks, not directly from monkeys. Symptoms include fever, headache, bleeding, and neurological issues. Early diagnosis improves survival. Treatment focuses on managing symptoms like providing IV fluids and rest.
Web Summary : कर्नाटक में मंकी फीवर (केएफडी) से 29 वर्षीय युवक की मौत। संक्रमण माकड़ों से नहीं, बल्कि संक्रमित टिकों से फैलता है। लक्षणों में बुखार, सिरदर्द, खून बहना और तंत्रिका संबंधी समस्याएं शामिल हैं। शीघ्र निदान से बचने की संभावना बढ़ जाती है। उपचार लक्षणों के प्रबंधन पर केंद्रित है, जैसे कि IV तरल पदार्थ और आराम प्रदान करना।