पुरवठा बरोबर असताना युरिया मुरतोय कुठे?

गोंदिया : सध्या खरीप हंगाम सुरू असून, रोवणीची कामे जवळपास पूर्णपणे आटोपली आहेत. त्यामुळे आता शेतकऱ्यांना युरियाची गरज आहे. मात्र बाजारपेठेत युरिया खत मिळत नसल्याने शेतकऱ्यांची त्यासाठी भटकंती सुरू आहे. काही विक्रेत्यांकडे युरिया असून, ते यासोबत युरिया खत घेण्यासाठी ११०० रुपयांची संयुक्त खते घेण्याची सक्ती करीत आहेत. कृषी विभागाच्या माहितीनुसार, मागणीच्या तुलनेत पुरवठा बरोबर आहे. मग युरिया नेमका मुरतोय कुठे? हे कळण्यास मार्ग नाही.

यंदा खरीप हंगामात १ लाख ८१ हजार हेक्टरवर धानाची लागवड करण्यात आली आहे. याच दृष्टीने कृषी विभागाने खताचे नियोजन केले आहे. खरीप हंगामासाठी कृषी विभागाने एकूण २१ हजार ८९० टन खताची मागणी केली आहे. यापैकी १८ ऑगस्टपर्यंत १२ हजार ८५० मेट्रिक टन युरिया जिल्ह्याला प्राप्त झाला आहे. महिन्यानुसार खताचे मंजूर केलेले नियतन आणि केलेला पुरवठा बरोबर आहे. मात्र यानंतरही संपूर्ण जिल्ह्याभरातच युरिया खत मिळत नसल्याची शेतकऱ्यांची ओरड आहे. मागणी व पुरवठा बरोबर असताना युरिया नेमका जातो कुठे हे कळायला मार्ग नाही. युरियाची कृत्रिम टंचाई निर्माण करून अतिरिक्त दराने त्याची विक्री केली जात असल्याची शंका बळावली आहे. तर काही विक्रेते युरिया देण्यासाठी संयुक्त खते घेण्याची सक्ती शेतकऱ्यांवर करीत असल्याची शेतकऱ्यांची तक्रार आहे. पण, या सर्व प्रकाराकडे कृषी विभाग डोळे मिटून पाहत आहे.

.....

१३ कृषी केंद्रांना बजावली नोटीस

कृषी केंद्र संचालकांना खताची विक्री करताना ई पास मशीनवर नोंद घेऊन शेतकऱ्यांचे अंगठे त्यावर लावणे अनिवार्य आहे. ई-पास मशीनमधील स्टाॅक आणि स्टॉक बुकवरील स्टॉकची नोंद बरोबर असणे आवश्यक आहे. मात्र १३ कृषी केंद्रांमध्ये या नोंदी बरोबर न आढळल्याने या कृषी केंद्रांना कृषी विभागाने कारणे दाखवा नोटीस बजावली आहे.

.......

बफर स्टॉकमधील युरियाचे वितरण

खताची टंचाई निर्माण होऊ नये यासाठी खताचा काही बफर स्टॉक करून ठेवला जातो. टंचाईच्या कालावधीत या खताचा वापर केला जातो. आतापर्यंत १९८० मेट्रिक टन युरिया खताच्या बफर स्टॉकचा वापर करण्यात आला आहे.

.....

महिन्यानुसार युरिया खताचा झालेला पुरवठा

एप्रिल : २०,६२४

मे : ३,०६५

जून : ४,८११

जुलै : ४,५९३

ऑगस्ट : ४,०५५

...................